Народната банка повторно ја зголемува референтната каматна стапка. Советот на НБРСМ одлучи и ова зголемување да изнесува 0,15 процентни поени и сега каматата на благајничките записи изнесува 6,30 отсто. На седницата беше одлучено да се зголемат и каматните стапки на расположливите депозити прекуноќ и на седум дена, за по 0,15 п.п., и сега тие ќе изнесуваат 4,20 отсто и 4,25 отсто. Понудата на благајнички записи на редовната аукција е непроменета и изнесува десет милијарди денари.
„Заради зајакнување на досегашните позитивни ефекти врз валутната структура на штедењето, како и за поддршка на процесот на монетарна трансмисија, Советот на Народната банка донесе одлука за дополнително зголемување на стапката на задолжителна резерва на девизните обврски на банките од 20 на 21 отсто, а зголемен е и процентот на одржување на задолжителната резерва од обврските во странска валута што се исполнува во евра, од 80 на 81 отсто. Овие измени ќе се применуваат од 20 декември 2023 година“.
Според Народната банка, одлуката за промена во каматните стапки е условена од најновите податоци и оцени за клучните показатели за монетарната политика, кои упатуваат на постепена стабилизација, иако сѐ уште постојат ризици. Во согласност со монетарните мерки преземени од крајот на 2021 година наваму, како и намалените притисоци од увозните цени, домашната инфлација и натаму забавува и во август 2023 година на годишна основа изнесува 8,3 отсто. Базичната стапка на инфлација исто така забавува, укажувајќи на значително помали ценовни притисоци од помалку променливите ценовни категории, а во согласност и со постојаното забавување на растот на личната потрошувачка. Сепак, домашната инфлација и натаму е на релативно високо ниво, што претставува ризик за инфлациските очекувања.
МИА
„Што се однесува на домашната економска активност, во вториот квартал од 2023 година реалниот раст на БДП забави, сведувајќи се на 1,1 отсто на годишна основа од 2,1 отсто во претходниот квартал. Од структурен аспект, растот произлегува од нето-извозот, дополнет и од личната потрошувачка, која постепено забавува. Остварувањата во првата половина од годината се малку подобри од проекциите на Народната банка, но ризиците од надворешното опкружување за економската динамика и натаму се неповолни“.
Во согласност co меѓународните стандарди, нивото на девизните резерви на крајот на август е соодветно за одржување на стабилноста на курсот на домашната валута. Од почетокот на годината девизните резерви бележат раст при поволни поместувања на девизниот пазар.
.webp){kind=icon}
