Почна увозот на работници - во земјава работат стотина Индијци

Заклучно со септември, во Македонија имало 105.357 невработени што активно бараат работа. Тоа е последен податок од Агенцијата за вработување. Во согласност со последните податоци на Државниот завод за статистика што се однесуваат на првата половина од годината пак, 689.714 лица во земјава се вработени. Стапката на невработеноста е историски најниска од независноста и изнесува 13,1 отсто заклучно со вториот квартал од годинава.

Тие 13,1 отсто не се малку ако се спореди со другите земји. Тоа значи дека барањето работници не би требало да биде тешко. Но главен проблем на македонското стопанство, како и на сите економии всушност, е токму недостигот од работници.

Проблемот е дотолку поголем што стара вест е дека се бараат работници од странство. Првиот чекор е отворениот пазар на труд со земјите од Отворен Балкан (Србија и Албанија). Вториот чекор е ангажирање работници од далечните земји во Азија.

И така, во моментов во земјава, и покрај постојните над 100.000 невработени, ангажирани се над 4.000 лица од странство за кои Агенцијата за вработување издала дозвола.

Во земјава работат стотина Индијци 

Во согласност со податоците на Агенцијата за вработување, заклучно со крајот на октомври во земјава им се издадени дозволи за вработување на 4.525 странци.

Најголем дел од нив е од Турција.  Во Македонија работат над 2.000 лица од таа земја. Следуваат Косово и Србија со над 300 работници, па Албанија и Индија.

Во земјава странските работници, во согласност со евиденцијата на Агенцијата, најчесто работат како градежни работници, столари, електричари, армирачи, но има и менаџери.

Работодавците велат дека ангажирањето работна сила од далечните азиски земји е прашање за преживување. Нема иднина за компаниите ако нема работници, а тука не можат да ги најдат.

Во евиденцијата на статистичарите, пак, во моментов во земјава се слободни 8.059 работни места. Половината од нив се во преработувачката индустрија, трговијата и во градежништвото.

Зошто тие 100.000 од АВРМ не се „пожелни“?

Каква е структурата на невработените што се водат како активни баратели на работа на списоците на Агенцијата за вработување? Над 50.000 од нив имаат на 45 години.

Дури 64.000 од сите невработени во земјава не работеле ништо подолго од две години, а над 62.000 се без образование.

Газдите велат дека платата не е проблем

И додека граѓаните негодуваат на високите цени и на трошоците што не можат да ги покријат со платите, работодавците и државата се фалат со растот на платите.

Работодавците велат дека во последниот период платите растат забрзано и дека тие не се главниот проблем за одливот на стручните кадри, туку целокупниот амбиент во државата, почнувајќи од лошото образование и здравство, преку лошата инфраструктура и високата корупција.

Растот на просечната плата особено е очигледен во последната година. Таа надмина 600 евра, што се должи и на недостигот од работна сила и на растот на трошоците за живот.

Во моментов нема коментари за веста. Биди прв да коментира...

Остави коментар