Генералниот директор на Директоратот за проширување, Јан Копман, по претставувањето на планот пред министрите од регионот, денеска во Скопје порача дека планот за раст треба да ги удвои економиите на земјите од регионот, така што од моменталните шест илјади евра просечен БДП по жител, за десет години да биде 12 илјади евра.
Од шест милијарди евра за Западен Балкан, речиси 860 милиони се на располагање за Северна Македонија.
Копман, на заедничката прес-конференција по завршување на регионалниот министерски состанок, упати честитки за, како што рече, енергијата, посветеноста и далековидоста, порачувајќи дека ова претставува одличен старт и најавувајќи дека разговорите продолжуваат следната недела во Брисел.
Прочитај повеќе
Министри од регионот во Скопје ќе преговараат за планот на ЕУ за раст на Западен Балкан
Планот на ЕУ за раст на Западен Балкан е опишан како подадена рака кон земјите од регионот со цел да се создададат поволни економски услови.
09.11.2023
„Имавме одлична дискусија со министрите од целиот регион. Искрено кажано, беше многу попродуктивна од тоа што го очекував“, изјави Копман.
Планот за раст, како што посочи Копман, предвидува три нешта - отстранување на пречките и интегрирање на заедничкиот пазар на ЕУ и помагање за интегрирање на пазарите од регионот со реформи и инвестиции, поддржани со фонд од шест милијарди евра од ЕУ.
Вицепремиерот за европски прашања Бојан Маричиќ порача дека планот за раст е најамбициозниот механизам на ЕК во досегашниот процес за интеграција на земјите од Западен Балкан.
„Со планот се предвидува забрзување на реформите, економскиот раст и многу потребната социоекономска конвергенција. Овој план за раст е конкретна финансиска и политичка инвестиција на ЕУ во Македонија и другите држави од Западен Балкан. Овој план го гледаме како подадена рака на ЕУ за забрзување на нашето членство во Унијата до 2030 година“, изјави Маричиќ.
Државите од Западен Балкан треба да подготват своја реформска агенда и да ја поднесат во рок од три месеци, а во насока на зајакнувањето на владеењето на правото и основните права.
„Веќе формиравме национална структура за развој и имплементација на овој план за раст“, изјави Маричиќ.
Министерот за финансии Фатмир Бесими рече дека ова е конкретен чекор и јасна политичка порака од ЕУ дека регионот го гледа како дел од ЕУ во блиска иднина.
„Ова е можност да се забрза растот. Ако сега регионот, според анализите, е негде меѓу 30 и 50 проценти од БДП по жител, во однос на просекот на ЕУ, се планира за еден период растот на економијата од регионот да се удвои“, изјави Бесими.
На состанокот во Скопје со генералниот директор од Директоратот за проширување присуствуваа министрите од регионот. Состанокот е почетната точка во конкретната реализација на реформските агенди што земјите со забрзано темно треба да ги подготват до крајот на годината и веќе во следната година да имаат и пристап до дел од средствата од фондот.
.webp){kind=icon}
