.webp){kind=icon}
Народната банка денеска соопшти дека Комитетот за оперативна монетарна политика одлучи каматните стапки да останат непроменети, во услови на забавување на инфлацијата и поволен девизен пазар, но и при сè уште присутни ризици.
„Каматната стапка на благајничките записи останува на нивото од 6,30 отсто, со истовремено задржување на каматните стапки на депозитите прекуноќ и на седум дена на нивоата од 4,20 отсто и 4,25 отсто, соодветно. Понудата на благајнички записи на редовната аукција е непроменета и изнесува 10 милијарди денари“, се наведува во соопштението од НБРМ.
Инфлацијата во декември 2023 година изнесува 3,6 отсто на годишно ниво, при значително намален притисок од цените на храната и енергијата, но и пониски ценовни притисоци од помалку променливите категории, во согласност и со преземените монетарни мерки. Сепак, нивото сѐ уште е над историскиот просек, а ризиците во однос на идната динамика на цените и натаму постојат, за што придонесува неизвесноста од движењето на цените на светските берзи, но и одредени домашни фактори.
„Состојбата на девизниот пазар е стабилна и движењата се поволни. Нивото на девизните резерви на крајот на декември изнесува 4.538,5 милиони евра, што, според меѓународните стандарди и показателите што се следат, е соодветно ниво за задржување на стабилноста на курсот на домашната валута. Во текот на изминатата година, девизните резерви забележаа раст, којшто ги надмина очекувањата и главно е резултат на релативно високите интервенции на Народната банка за нето-откуп на вишокот девизни средства од банкарскиот систем“, се наведува во извештајот.
Реалниот раст на БДП во третиот квартал од 2023 година изнесува 1,2 отсто на годишна основа (по растот од 1,1 отсто во претходниот квартал) и е во согласност со растот проектиран за овој квартал според октомврискиот циклус на проекции. Анализирано по компоненти, растот произлегува од индустриското производство, прометот во вкупната трговија и градежништвото, по падот во претходниот квартал, додека кај реалниот промет во угостителството се забележува забрзување на годишниот раст. Во однос на ризиците за растот, тие и за следниот период се претежно надолни и се поврзани пред сѐ со зголемените геополитички тензии.
Во монетарниот сектор, според податоците заклучно со декември 2023 година, депозитниот потенцијал на банките расте малку посилно од очекувањата, со стапка од 9,1 отсто, а кредитната поддршка на приватниот сектор и натаму расте, но поумерено и изнесува 5,1 отсто.
Од Народната банка нагласуваат дека клучните макроекономски показатели упатуваат на остварувања што се во согласност со очекувањата. Сепак, условите за водење на монетарната политика сѐ уште се неизвесни и налагаат натамошно внимателно следење на динамиката и факторите на инфлацијата и инфлациските очекувања и претпазливост во водењето на макроекономските политики што влијаат врз побарувачката во економијата.
