.webp){kind=icon}
Континуиран раст на увозот на прехранбени производи има во Македонија во изминатава деценија. Сè почесто наместо тетовски грав, ресенско јаболко, македонски лук и други производи со кои некогаш се гордееше Македонија, во малопродажбата може да се сретнат грав од Азербејџан, јаболка од Турција и лук од Кина. Вредноста на увозот на храна во земјава се зголемила од 513 милиони евра во 2013 година на 886 милиони евра во единаесетте месеци од 2023 година.
Статистичките податоци откриваат дека раст на увозот има речиси кај сите категории прехранбени производи. Вредноста на увезеното месо и преработки од месо се зголемила од 127 милиони евра во 2013 година на 188 милиони евра во периодот јануари-ноември 2023 година.
За десет години вредноста на увезената риба и морска храна се зголемила од 17 на 28 милиони евра.
Раст има и кај увозот на зеленчук и овошје. Во 2013 година увозот на зеленчук и овошје во Македонија изнесувал 63 милиони евра, а лани, заклучно со ноември, се зголемил на 128 милиони евра.
Слични трендови има и кај увозот на млечни производи. За една деценија увозот на млечни производи и птичји јајца се зголемил од 44 на 85 милиони евра.
Ако донекаде е разбирливо зголемувањето на увозот на риба и морска храна, останува енигма континуираното зголемување на увозот на зеленчук, овошје, месо и млечни производи, ако притоа се земе предвид дека Македонија важи за земјоделска земја и дека во изминатава деценија стотици милиони евра од буџетот на државата завршија како субвенции во земјоделството.
Кога станува збор за земјите од кои увезуваме најмногу храна, убедливо на првото место во периодот јануари-ноември 2023 година е Србија, од каде што сме увезле храна во вредност од 175 милиони евра. Забележливо е дека вредноста на увозот на храна во Македонија е многу поголема од некои подалечни и егзотични земји отколку од соседните држави. На пример, во единаесетте месеци од 2023 година Македонија увезла храна од Германија во вредност од 60 милиони евра, а од Бразил храна во вредност од 48 милиони евра. Од друга страна, истовремено увозот на храна од Бугарија изнесувал 22 милиона евра, а од Грција 34 милиони евра.
