Колку се подготвени македонските директори за вештачка интелигенција?

Извршните директори во Македонија годинава се пооптимистични за разлика од претходната и веќе преземаат чекори кон трансформација на бизнисите. Наспроти зголемениот оптимизам, локалните извршни директори ја делат истата загриженост со нивните глобални колеги во однос на долгорочната одржливост на нивниот бизнис, покажуваат резултатите од 27-то истражување за извршни директори што го спроведува „Прајсвотерхаускуперс“ (PricewaterhouseCoopers – PwC).

Имено, 45 проценти од глобалните и 40 проценти од локалните извршни директори одговорија дека не се сигурни дека нивните компании ќе преживеат повеќе од една деценија ако продолжат по сегашниот пат. Соочени со нови предизвици, извршните директори од Македонија ја препознаваат  потребата од трансформација на нивните бизниси за да им испорачаат одржливи резултати на нивните акционери, содружници и општеството.

Македонските извршни директори очекуваат подобрување на растот на глобалната економија споредено со нивните очекувања од претходната година. Спротивно на глобалните колеги, македонските испитаници имаат зголемени очекувања за пораст на приходите на нивните бизниси во иднина. 

Споредено со претходните пет години, во следните три години извршните директори во Македонија очекуваат поголемо влијание од технолошките промени, промената на потрошувачките навики, конкурентските  компании и климатските промени врз начинот на кој нивните компании ќе креираат и добиваат вредност.

Спротивно на тоа, македонските извршни директори сметаат дека ризиците како инфлација, геополитички конфликти и општествена нееднаквост ќе имаат намалено влијание врз нивните бизниси во следните 12 месеци, споредено со претходната година.

„Технолошките и климатските промени, како и другите растечки мегатрендови, продолжуваат да ги водат извршните директори кон адаптација на бизнисите“, велат од ПВЦ.

Оттаму додаваат дека извршните директори во Македонија се предводени од оптимистички очекувања за успешно работење на нивните компании во иднина, но споредено со нивните глобални и регионални колеги се добива впечаток дека имаат поголем оптимизам за одржливоста на растот на бизнисите во текот на следната декада. 

„За одржување стабилен развој на бизнисите на долг рок, најважно е извршниот директор да биде свесен во секое време дека постојат потенцијални закани“, посочуваат од ПВЦ.

Според нив, извршните директори очекуваат дека во следните три години значително ќе се зголеми притисокот од фактори што влијаат врз промена на нивните бизнис-модели.

„Ова е само уште еден знак дека потребата од трансформација на бизнисите расте. Извршните директори треба да ги земат предвид желбите и потребите не само на потрошувачите туку и на сите заинтересирани страни, како доставувачи, бизнис-партнери, инвеститори, регулатори, и општеството во целина“, укажуваат од ПВЦ.

Во истражувањето се констатира дека климатските промени и генеративната вештачка интелигенција имаат зголемено влијание на цели индустрии. Извршните директори и нивните водечки тимови се под притисок поголем од кога било да донесуваат брзи одлуки што ќе придонесат за трансформирање на бизнис-моделите и ќе ја обезбедат иднината на компанијата.

„Извршните директори во Македонија можеби ќе треба да се фокусираат на она што е во нивна контрола, како на пример да го намалат непродуктивното трошење за да ги зголемат добрите инвестиции, и да развиваат способности што ќе им обезбедат конкурентска предност. Дополнително, нивните водечки тимови би можеле да вклучат експерти за ВИ или зелена технологија“, наведуваат од ПВЦ.

Оттаму посочуваат дека глобално е препознаено дека генеративната ВИ може да им помогне на бизнисите да се трансформираат и извршните директори би требало да бидат отворени со своите вработени за нивните планови да ја вклучат оваа нова технологија во секојдневните операции.

„Доквалификувањето на вработените и нивното охрабрување да користат ВИ за да ги зголемат продуктивноста и иновирањето се активности што финално ќе придонесат до пораст на вредноста на човечкиот капитал. Локалните извршни директори можат успешно да напредуваат во несигурната 2024 година преку фокусирање на факторите што се во нивна контрола и преку преземање активности за трансформација, а со тоа ќе имаат можност да донесат промени во нивната компанија и да ги постигнат нивните бизнис-цели“, се истакнува во истражувањето.

Во моментов нема коментари за веста. Биди прв да коментира...

Остави коментар