Анита Ангеловска-Бежоска за „Блумберг“: Губиме поради долгото чекање за влез во ЕУ

Гувернерката на Народната банка, Анита Ангеловска-Бежоска, во интервју за „Блумберг“ изјави дека недостигот од напредок во разговорите за влез во Европската Унија ги одвраќа инвеститорите од Македонија.

Во текстот објавен на терминалот на „Блумберг“ се констатира дека „поранешната југословенска република со околу два милиона жители чека речиси две децении да ги започне преговорите за членство во ЕУ“.

„Гледајќи ги досегашните искуства со другите економии, јасно е дека пристапувањето ќе ја зајакне економијата“, вели гувернерката Анита Ангеловска-Бежоска. „Но недостигот од напредок е пречка за инвеститорите, кои сè уште чекаат да видат одреден моментум во разговорите“, рече таа во интервјуто дадено во Сплит, Хрватска.

Таа посочува дека бруто-домашниот производ на Македонија е 40 проценти од просекот на ЕУ и дека на земјата ѝ требаат повеќе технологија и иновации за да ја зголеми продуктивноста.

Во текстот се укажува дека околу 60 проценти од Македонците го поддржуваат членството во ЕУ, но и дека бројот на испитаници што сметаат дека земјата никогаш нема да му се приклучи на блокот пораснал од 23 проценти во 2014 година на 30 проценти минатата година, според анкетата на Институтот за демократија „Социетас цивилис“ и Фондацијата „Конрад Аденауер“.

Авторите посочуваат дека ЕУ ѝ даде формално одобрение на државата да ги започне пристапните преговори во 2020 година, но и дека потегот беше блокиран поради конфликтот со Бугарија.

„Сега Брисел бара од Северна Македонија да го измени својот Устав за да ги спомене Бугарите меѓу другите националности што живеат во земјата. Промената е длабоко непопуларна во јавноста, но ќе треба да се реши од следната влада што ќе се појави по општите избори во мај“, се наведува во текстот на „Блумберг“.

Во него се констатира дека Македонија од 2005 година се обидува да го започне процесот на пристапување и дека успеа да го реши долгогодишниот спор за името со Грција и да влезе во НАТО во 2019 година.

Сепак, разговорите со Брисел не забележаа напредок и централната банка „не ги зема предвид позитивните ефекти од потенцијалното членство или од забрзувањето на процесот на пристапување во ЕУ“ во своите макроекономски проекции, според гувернерката.

Со помош на Јасмина Кузмановиќ и Слав Оков

 

 

Во моментов нема коментари за веста. Биди прв да коментира...

Остави коментар