Граѓаните сѐ повеќе ги уживаат придобивките од дигиталните плаќања

Во 2023 и 2024 година се зголемува употребата на платежните картички од страна на граѓаните за извршување на плаќањата во трговијата во земјата, што се согледува преку засилениот годишен раст на бројот и вредноста на плаќањата, за 18 проценти и 17 проценти, соодветно.

Од Народната банка информираат дека бројот и вредноста на плаќањата на граѓаните со кредитни трансфери (т.н. платни налози) забележуваат годишен раст од 5 и 12 проценти, соодветно.

„Иако плаќањата со кредитни трансфери сѐ уште најмногу се вршат на шалтерите на банките (71 процент), податоците за изминатата година ја потврдуваат и сѐ почестата употреба на дигиталните канали, со годишен раст од 16 проценти кај бројот и 19 проценти кај вредноста на плаќањата иницирани електронски“, соопшти Народната банка.

Притоа, граѓаните сѐ почесто ги употребуваат мобилните апликации за извршување на плаќањата коишто бележат раст од 22 проценти кај бројот и 30 проценти кај вредноста.

„Граѓаните можеа на удобен и сигурен начин да ги извршуваат плаќањата во земјата имајќи предвид дека на крајот од 2023 година во оптек беа 1,9 милиони платежни картички, од коишто 76 проценти се засновани на бесконтактна технологија“, наведуваат од централната банка.

Оттаму додаваат дека инфраструктурата за прифаќање плаќања со платежни картички брои 32.198 уреди на физичките места на продажба, кај 15.804 трговци во земјата, од кои дури 95 проценти ја поддржуваат бесконтактната технологија. 

„Бројот на картички со бесконтактна технологија и уредите на физичките места на продажба коишто ја поддржуваат оваа технологија забележа годишен раст (во споредба со 2022 година) од 0,5 проценти односно 18 проценти. Годишен раст од 6 проценти во однос на 2022 година е забележан и кај бројот на трговците коишто прифаќаат платежни картички при продажба на стоки и услуги на физичките места на продажба во земјата“, посочуваат од Народната банка.

За извршувањето на плаќањата со прифаќање на платежните картички, според најновите податоци за 2023 година, трговците плаќале просечен надоместок во висина од 1,12 проценти од вредноста на прометот, што е помалку за 0,01 п.п. во споредба со 2022 година.

„Најголемо намалување се забележува кај надоместокот за плаќањата за дејноста информатичка технологија и бела техника и услугите на државните институции (за 0,08 п.п. кај двете групи дејности) и на бензинските станици (за 0,06 п.п.).“, соопшти Народната банка. 

 

Во моментов нема коментари за веста. Биди прв да коментира...

Остави коментар