.webp){kind=icon}
Инфлацијата се намали од 19,8 на 4 проценти, како резултат на монетарното затегнување и нормализацијата на цените на храната и енергијата, се наведува во заклучоците од годинашниот економски и финансиски дијалог на Европската Унија со земјите од Западен Балкан, Турција, Грузија, Молдавија и Украина. Европската комисија ги нотира мерките што Народната банка ги презеде во изминатиот период, со цел да ги стабилизира инфлацијата и инфлациските очекувања и да ја поттикне денаризацијата, соопшти Народната банка.
Во заклучоците, како што посочуваaт од централната банка, е наведено дека банкарскиот сектор останал стабилен, со поволни показатели за адекватноста на капиталот и ликвидноста, како и ниски нивоа на нефункционални кредити. Европската комисија препорачува монетарната политика да остане затегната, онолку колку што е потребно, за да се закотват инфлациските очекувања на ниво што ќе осигури стабилност на цените и на девизниот курс. Се наведува и дека е неопходно да се заштити независноста на централната банка во извршувањето на нејзините клучни законски задачи.
Во рамките на економскиот и финансискиот дијалог на ЕУ со земјите од Западен Балкан, Турција, Грузија, Молдавија и Украина, кој се води врз основа на поднесената Програма за економски реформи 2024-2026 година од страна на земјите кандидати, институциите на ЕУ дадоа осврт и оцена на политиките и реформите во различни сфери на економијата и финансискиот систем, додека носителите на политиките посочија осврт и очекувања за идниот период.
Вицегувернерката Емилија Нацевска, која ја претставуваше Народната банка, во своето излагање истакна дека Народната банка ќе продолжи да води претпазлива монетарна политика, сè додека со сигурност може да се каже дека процесот на дезинфлацијата е одржлив и дека на среден рок ќе се осигури ценовната стабилност. Таа посочи и дека Народната банка ќе продолжи преку мерки и регулаторни барања да ја зајакнува отпорноста на банкарскиот систем и да ги унапредува сопствените институционални капацитети за подобро справување со светските трендови и предизвици.
Нацевска посочи дека Планот за раст за Западен Балкан дава можност за побрза интеграција на регионот во Единствената платежна област во евра (СЕПА).
Народната банка веќе поднесе предапликација за влез во СЕПА и е подготвена да работи на затворање на евентуалните регулаторни јазови како предуслов за влез во СЕПА, што би донело повеќекратни предности за потрошувачите, компаниите и финансиските институции.
Во своето излагање вицегувернерката се осврна и на придонесот на Народната банка кон зелената транзиција и подготовките на банкарскиот систем за овој процес.
Народната банка го усвои првиот среднорочен план во областа на управувањето со климатските промени за периодот 2023-2025 година, кој предвидува активности за регулирање и надзор на климатските ризици, вклучувајќи и стрес-тестирања на банките поврзани со климатски промени, а беа усвоени и насоки за управување со климатските ризици за банките.
Централната банка веќе ги направи и првите чекори за зазеленување на своето инвестициско портфолио во рамките на управувањето со девизните резерви.
