Анкета на Народната банка: Инфлација од 3,9 проценти во 2024

Анкетата за инфлациските очекувања и очекувањата за движењето на реалниот БДП за периодот 2024 ‒ 2026 година, спроведена во јуни покажува малку пониска просечната стапка на инфлација (за оваа година), како и понизок раст на БДП, соопшти Народната банка. 

„Економските аналитичари и натаму ги поврзуваат ваквите очекувања пред сѐ со постепеното забавување на годишниот раст на цените во последниот период, додека најголемите ризици се поврзуваат со воениот судир во Украина, конфликтот на Блискиот Исток, како и влијанието на климатските промени, при што нагласуваат дека сѐ уште постои висока неизвесност околу текот на идните случувања“, наведуваат од Народната банка.

Во однос на инфлацијата, испитаниците и натаму очекуваат нејзино постепено забавување. Во споредба со претходната анкета, испитаниците во оваа анкета очекуваат малку пониска просечна стапка на инфлација од 3,9 проценти за 2024 година (4,1 проценти во претходната анкета), при непроменети очекувања за 2025 година (три проценти) и слични очекувања за 2026 година (2,7 проценти, наспроти 2,6 проценти во претходната анкета).

„Испитаниците и натаму очекуваат поумерени притисоци врз инфлацијата како резултат на постепеното стабилизирање на цените нa храната и енергентите, а исто така се очекува дека за забавување на инфлацијата ќе придонесат и мерките преземени од носителите на политиките, како и забавувањето на странската инфлација“, велат од Народната банка.

Како фактори коишто би можеле да предизвикаат притисоци за зголемување на инфлацијата, испитаниците и натаму ги посочуваат траењето и неизвесноста околу разрешувањето на војната во Украина и на конфликтот на Блискиот Исток, како и климатските промени врз цените на примарните производи. Исто така, испитаниците сметаат дека можните зголемувања на платите како резултат на случувањата на пазарот на труд, како и евентуалните влошувања во снабдувањето со енергија и порастот на цените на регулираниот пазар би можеле да доведат до нови инфлациски притисоци. 

Во поглед на економската активност, кај очекуваната стапка на раст е направена мала надолна корекција. Така, испитаниците очекуваат економски раст од 2,3 проценти оваа година (2,6 проценти во претходната анкета), 3,1 проценти за 2025 година (3,3 проценти во претходната анкета), а за 2026 година се очекува раст од 3,7 проценти (3,8 проценти во претходната анкета). Во однос на факторите, испитаниците и во оваа анкета ги посочуваат влошените изгледи за раст на економиите на главните трговски партнери, неизвесноста од идниот тек на војната во Украина, конфликтот на Блискиот Исток и климатските промени и нивното влијание врз синџирите на снабдување.

„Неповолно може да делува и воздржаноста на домашните и на странските инвеститори, при затегната монетарна политика во глобални рамки и натамошен раст на трошоците за финансирање. Исто така, испитаниците и натаму ја наведуваат неизвесноста поврзана со текот напреговорите со ЕУ како можен фактор на ограничување на економскиот раст во следниот период“, наведуваат од Народната банка.

Од друга страна, испитаниците сметаат дека по завршувањето на изборниот процес и формирањето нова влада би можело да дојде до надминување на неизвесноста на домашната политичка сцена и би се продолжило со забрзано спроведување на инвестициските проекти, пред сѐ поврзани со патната инфраструктура и во енергетскиот сектор. Исто така, постепеното стабилизирање на инфлацијата, а со тоа и евентуалното намалување на каматните стапки, како и растот на платите и пензиите, би можеле да придонесат за раст на личната потрошувачка и инвестициите, што би се одразило позитивно врз економскиот раст.

Во моментов нема коментари за веста. Биди прв да коментира...

Остави коментар