Колку платија Македонците за одмор: Бумот забави, цените и ратите во вис

Постпандемискиот туристички бум и официјално заврши. Економските податоци во САД покажуваат дека забавувањето на економијата придонесува граѓаните да ја зауздат желбата за патување и да го стегнат ременот.

Побарувачката засега е сè уште здрава, но платите веќе не растат толку брзо и сè повеќе домаќинства се борат да ги плаќаат високите кредитни трошоци.

„Мислам дека постпандемиското патување, кога луѓето одеа на долги одмори, останува зад нас“, вели Николас Џонс, аналитичар во „Ситизенс ЏМП секјуритис“. „Консолидираната побарувачка за патување е намалена. Се враќаме на нормалните шеми на патување од пред пандемијата“.

Докази за забавувањето има насекаде. Се намалува бројот на резервации на онлајн платформите за сместување, паѓа и продажбата на авионски билети затоа што потрошувачите се поштедливи. Тие што патуваат, го кратат престојот. Податоците во САД покажуваат дека просекот од година на година се намалува за 14 отсто. Сега изнесува 6,2 дена во однос на претходните 7,8.

Bloomberg

Цените во Грција, најбараната дестинација, се зголемија за 20 отсто

Аранжманите што ги продаваат македонските туристички агенции годинава се од 15 до 35 отсто повисоки од лани. Тоа придонесе и македонските потрошувачи годинава да го стегнат ременот.

За разлика од лани, кога аранжманите на пример за Хургада или Турција се продаваа веднаш, годинава се чекаше подолго во надеж дека цените ќе паднат“, вели во изјава за „Блумберг Адрија“ Милко Ѓоров, сопственик на туристичката агенција „Ескејп травел“.

„Имавме период од 15 јули до 15 август кога сè беше полно, но имаше и периоди кога потрошувачите чекаа цените да паднат, чекаа таканаречени понуди ’во последен момент’ . Друга тенденција што се забележа годинава е дека се кратат деновите за одмор“, вели тој.

Иво Крстевски од туристичката агенција „Пилот травел“ вели дека е рано да се сумираат бројките за сезоната, но динамика имало и годинава иако цените секаде се повисоки од лани. Раст на цените е забележан и кај хотелското сместување и кај авионскиот превоз.

„Најголем интерес нашите клиенти и годинава покажаа за Грција, каде што цените се околу 20 отсто повисоки од минатата година. Годинава имаме уште една новина кога станува збор за оваа земја. За разлика од претходно, кога имавме фиксни цени од почетокот на сезоната, сега цените станаа динамични и се менуваа во зависност од побарувачката. Имавме ситуации  ’во последен момент’ да се добие навистина добра понуда“, вели тој.

За егзотичните дестинации превозот останува проблем

Ѓоров вели дека годинава поради генерално повисоките цени на услугите, поголема била побарувачката за хотелски аранжмани.

„Тие што резервираа во февруари имаа попусти од 10 до 15 отсто, што на аранжмани од 3.000 евра е добра цена“, вели тој.

Од 5 до 10 отсто од клиентите, според Ѓоров, секоја година бараат полуксузно сместување, аранжмани во висина од 4.000 до 5.000 евра, но годинава и во овој сегмент има намалување.

Поскапеа и авионските услуги, па, така, за егзотичните дестинации како Сејшели, Малдиви, Куба проблемот не е сместувањето, туку превозот.

„За овие дестинации не се скапи хотелите, туку проблем е да се стигне таму. Цената на авионскиот превоз може да изнесува и 70 отсто од аранжманот“, вели Крстевски за „Блумберг Адрија“.

Дијаспората го спасува домашниот туризам

Цените и во земјава се зголемите од 15 до 30 отсто, вели Крсте Блажевски, претседател на Асоцијацијата на хотелиери - ХОТАМ. Тоа придонесе да се забележи намалување на бројот на домашни туристи, но најпознатите дестинации во земјава, покрај Охридско Езеро, беа исполнети.

„Капацитетите беа исполнети и над 90 отсто. Тоа е благодарение на странските гости и на дијаспората. Сезоната почна уште во јули, цел месец порано од лани, и е успешна. Што се однесува до домашните гости, тука има пад. Домаќинствата се задолжени, им се зголемија каматите, мораа да мислат на нивното плаќање и не влегуваа во нови долгови“, објаснува Блажевски.

Според податоците на Државниот завод за статистика во првата половина од годината, бројот на домашни туристи се зголемил за 3,3 отсто во однос на лани, додека пак бројот на странски гости забележал раст од 14,4 отсто.

Традиционално, во земјава најмногубројни гости се Турците и Србите, но во јуни, поради субвенционираните авионски линии, забележaн е поголем раст кај бројот на гости од Холандија и Полска.