Раст на индустриското производство во Македонија

Индустриското производство во јули 2024 година во однос на јули 2023 година бележи раст од 3,8 отсто, објави Државниот завод за статистика.

По сектори најголем раст има во секторот рударство и вадење камен, од 14,9 отсто. Преработувачката индустрија бележи раст од 3,8 отсто, додека во секторот снабдување со електрична енергија, гас, пареа и климатизација има пад на производството од 1,1 отсто.

Растот во преработувачката индустрија го прават 12 оддели каде што е забележан раст на производството. Највисок раст има во одделот печатење и продукција на снимени медиуми од 121,4 отсто, потоа кај  производството на тутун од 69,3 отсто и производството на прехранбени производи од 41,3 отсто.

Најголем пад на производството има во секторот производство на компјутерски, електронски и оптички производи од 50 отсто и кај производството на фабрикувани метални производи, освен машини и опрема, каде што има пад на производството од 44,9 отсто.

Според главните индустриски групи, производството во јули 2024 година во однос на јули 2023 година бележи пораст кај енергија за 2,8 отсто, интермедијарни производи, освен енергија, за 3,4 отсто, трајни производи за широка потрошувачка за 33,2 отсто и нетрајни производи за широка потрошувачка за 24 отсто, додека кај капиталните производи бележи опаѓање за 20,1 отсто.

Кумулативно индустриското производство во периодот јануари -јули 2024 година во однос на периодот јануари-јули 2023 година е намалено за 3,9 отсто.

 

 

Во моментов нема коментари за веста. Биди прв да коментира...

Остави коментар