.webp){kind=icon}
Индексот на цени на аутпутот во земјоделството во август годинава споредено со истиот месец лани бележи пад од 2,4 проценти. Според податоците од Државниот завод за статистика (ДЗС), најмногу паднале цените на компирот, за 39 проценти, на овошјето и грозјето за 22,2 отсто, како и на житата и оризот, чија цена е за 21,6 процент пониска од пред една година.
Позначајно поскапување ДЗС регистрира кај зеленчукот, чија цена е за 11,3 отсто повисока на годишно ниво, и кај вината, кои се поскапи за 15,3 проценти.
Причината за поскапувањето на овие производи е помалиот род, што, според Васка Мојсовска, претседателка на Националната федерација на фармери, е резултат на три главни причини, и тоа климатските промени, долгогодишните ниски откупни цени и недостигот од вода за наводнување.
„Големо е влијанието од климатските промени. Имавме многу топло лето, последните два месеца со температури над 40 Целзиусови степени, што особено кај грозјето многу влијае на родот“, вели Мојсовска.
„Свое влијание имаат и претходните откупни цени, кои за поголем дел земјоделски производи со години се многу ниски. А, тука се и проблемите со наводнувањето, бидејќи има региони во кои водата за наводнување не стигнува навреме“, објаснува претседателката на Националната федерација на фармери.
Од друга страна, поевтинувањето на инпутите во земјоделството е многу помало. Најголем пад на цената има кај минералните ѓубрива, од 10,4 проценти, и кај семињата, чија цена е пониска за 6,8 отсто. Но поскапени се ветеринарните услуги и одржувањето на опремата за 2,5, односно за 5,4 отсто, како и другите стоки и услуги, чија цена ДЗС пресмета дека е повисока за 6,6 проценти.
