Индустријата останува во минус

Продолжува падот на индустриското производство, иако забавено. За разлика од септеври кога производствто се намали за близу 8 отсто, во октормви падот изнесувал 1,1 отсто, објави Државниот завод з статистика.

Кумулативно од почетокот на годината досега, индустриското производство е намалено за 3,8 отсто.

„Гледано по сектори, индустриското производство во секторот рударство и вадење на камен во октомври 2024 година, во однос на октомври 2023 година, бележи опаѓање од 8.2 отсто, во секторот преработувачка индустрија бележи пораст од 3.1 отсто, а во секторот снабдување со електрична енергија, гас, пареа и климатизација опаѓање од 20.9 отсто“, соопшти ДЗС.

Зголемувањето во секторот преработувачка индустрија е резултат, пред сѐ, на зголеменото производство во следните оддели: производство на тутунски производи, печатење и продукција на снимени медиуми, производство на хемикалии и хемиски производи, производство на основни фармацевтски производи и фармацевтски препарати, производство на метали, производство на мебел....

Текстилната индустрија тоне

И натаму најзабележителен е падот во текстилниот сектор односно кај производствто на облека. Во октормври намалувањето изнесува близу 20 отсто. Во овој сектор се намалува и бројот на работници.

Главниот проблем на производителите на облека во земјава се високите трошоци за вработените поради кои тие стануваат скапи за странските партнери. Цените во Европа се стабилизираа и сега странските партнери бараат да поевтинат и нарачките што ги прават во земјава.

„Но ние не можеме да го направиме тоа затоа што трошоците ни растат, особено трошокот за плати. Тоа значи дека ние губиме работа, се намалуваат нарачките“, изјави неодамна за „Блумберг Адрија“ Мирјана Перковска од Текстилниот кластер.

Странските компании наоѓаат нови партенри

Мароко и Бангладеш се само некои од земјите кон кои се вратат европските компании кога станува збор за текстилниот сектор затоа што тие се многу поевтини од земјава.

„Стануваме скапи за нашите партнери, а тоа води до намалување на обемот на работа. За разлика од нас, има пазари каде што трошоците се значително пониски. На пример Бангладеш, таму просечната бруто-плата во секторот е 200 долари, кај нас достигна до 800 евра. Просечната плата во секторот достигна до 60-70 отсто од просечната државна плата, што не е случај во ниту една земја затоа што ова е сепак трудоинтензивен сектор“, изјави неодамна за „Блумберг Адрија“ Ангел Димитров од Организацијата на работодавци на Македонија.

Во вакви услови се намалува и бројот на работници во некогаш најголемиот индустриски сектор во земјава. Во последните дваесетина години бројот на вработени се намалил од 60.000 на 20.000. Заклучлно со септември годинава, бројот на работници во  производството на облека бележи пад од 14,8 отсто, на годишно ниво намалувањето изнесува 12,3 отсто.

 

 

Во моментов нема коментари за веста. Биди прв да коментира...

Остави коментар