Негативната нето финансиска позиција на домашната економија на крајот од третиот квартал од 2024 година изнесува 582,7 милијарди денари (9,4 милијарди евра), што претставува продлабочување за 8 милијарди денари (130 милиони евра) во однос на претходниот квартал, а во однос на крајот на 2023 година нето финансиската вредност е продлабочена за 50 милијарди денари (813 милиони евра), покажуваат новите податоци на Народната банка за состојбата на финансиските сметки во државата. Во однос на релативните показатели, негативната нето-позиција во третиот квартал изнесува 65,4 проценти од БДП, што претставува влошување за 0,9 п.п. во однос на претходниот квартал.
„Анализирано од аспект на секторите, домаќинствата и секторот ‚странство‘ се нето-кредитори и ги финансираат другите сектори во националната економија (нефинансиските друштва и државата) што се нето-должници. Финансискиот сектор и натаму има речиси избалансирана нето финансиска позиција“, наведуваат од Народната банка.
Оттаму објаснуваат дека динамички гледано, на квартална основа, продлабочувањето на негативната нето финансиска вредност како процент од БДП произлегува од влошената позиција на нефинансиските друштва и финансиските друштва, во услови на подобрена нето-позиција на домаќинствата.
Прочитај повеќе
Ќе поскапува македонското задолжување: Нов предизвик
Глобалните приноси на државните обврцници почнаа да растат, а на крајот тоа може да е лошо за македонската економија
13.01.2025
Словенија издаде 30-годишна обврзница за милијарда евра. Кои се инвеститорите?
Вчера вечерта, Министерството за финансии во Словенија соопшти дека државата се задолжила за милијарда евра.
08.01.2025
Кредитните картички бледнеат, граѓаните се фрлија на купување станови
Се намалува атрактивноста на кредитните картички, а расте задолжувањето по основ на станбени, автомобилски и потрошувачки кредити.
10.10.2024
Од Народната банка информираат дека на крајот на третиот квартал од 2024 година вкупните средства на националната економија изнесуваат 65,8 милијарди евра и оствариле квартален раст од 991 милион евра или 1,5 процент, како резултат на порастот на вкупните финансиски средства кај сите сектори. Во однос на последниот квартал од 2023 година, вкупните средства на националната економија бележат пораст од 3,1 милијарди евра или 5,1 проценти.
„Нагорната промена е резултат на зголемените средства кај сите сектори, во најголем дел кај домаќинствата и финансиските друштва“, наведуваат од Народната банка.
На крајот на третиот квартал од 2024 година вкупните обврски изнесуваат 70,9 милијарди евра при остварен квартален раст од 1,1 милијарда евра или 1,5 процент, како резултат на порастот на обврските на сите сектори, а во најголем дел на финансиските и нефинансиските друштва. Во споредба со последниот квартал од претходната година, вкупните обврски бележат пораст од 3,9 милијарди евра или 5,6 проценти.
„Раст на вкупните обврски е забележан кај сите сектори, при што најголем придонес имаат нефинансиските и финансиските друштва“, посочуваат од Народната банка.
Анализирано по инструменти, на страната на средствата најголем квартален раст е забележан кај капиталот, должничките хартии од вредност, кредитите и побарувањата врз основа на побарувањата од пензиските шеми и осигурувањето. Намалување има единствено кај другите побарувања.
На страната на обврските, најголем квартален раст е забележан кај капиталот, готовите пари и депозитите и кредитите, додека намалување е забележано кај другите обврски.
.webp){kind=icon}