Среде војна урнавме рекорди во дел од трговијата со Русија и со Украина

Неделава беа одбележени три години откако на 24 февруари 2022 година почна војната во Украина, која освен што зеде голем број човечки жртви, посредно предизвика сериозни економски штети во Европа и на глобално ниво, пред сѐ поради поскапувањето на енергентите и, следствено, рекордната инфлација. Сепак, се чини дека воените дејства не влијаеја премногу на трговските односи меѓу Македонија и двете завојувани земји (Русија и Украина). Нашата анализа покажа дека во изминативе три години има периоди во кои биле урнати рекорди во трговската размена на одредени производи меѓу Македонија од една страна и Русија и Украина од друга страна.

Што тргуваме со Русија?

Токму 2022 година, кога дојде до разгорување на војната, Македонија ја заврши со рекордна трговска размена со Русија, во износ од 470 милиони евра, при што е забележан огромен дефицит на македонската страна. Остварен е увоз од Русија во износ од 419 милиони евра, а извоз од 51 милион евра. За таквиот резултат веројатно придонесува и енормниот пораст на цените на енергентите во тој период, кои, пак, се меѓу главните производи што ги увезуваме од Русија. Инаку, иако бележи мало намалување и следните две години (2023 и 2024 година), меѓусебната трговија бележи мултимилионски износи.

Анализата на најтргуваните производи покажува дека Македонија од Русија во овој период најмногу увезувала минерални горива односно нафта и природен гас, додека најмногу извезувала хемиски производи.

Дефицит во размената со Украина

Кога станува збор за Украина, со која Македонија исто така има повеќегодишна економска соработка, може да се забележи дека единствено во 2023 година доаѓа до позначително намалување на меѓусебната трговија споредено со претходните години. Како и со Русија, Македонија континуирано бележи дефицит во трговската размена со Украина.

Во однос на најтргуваните производи, лани Македонија остварила рекорден увоз на храна од Украина. Од друга страна, во оваа земја најмногу извезуваме хемиски и сродни производи, каде што остваруваме суфицит во трговската размена.

Примирје на повидок?

„Блумберг Адрија“ веќе пишуваше дека Украина постигнала договор со САД за заеднички развој на украинските природни ресурси, потег што може да ги намали неодамнешните тензии со претседателот Доналд Трамп и да ја унапреди целта на неговата администрација за прекин на огнот со Русија. Новата власт во САД отворено побара нов дијалог со Русија и двете страни остварија средба, а една од точките на агендата е примирјето во Украина. Американскиот претседател неодамна на средба со францускиот колега Емануел Макрон изрази надеж дека запирање на огнот меѓу двете завојувани страни би можело да се случи за неколку недели. Евентуалниот крај на војната се очекува да донесе можност за нови бизнис-зделки, пред сѐ за градежниот сектор и други индустриски гранки, со оглед на тоа што би следувала обнова на разурнатата Украина.

Во моментов нема коментари за веста. Биди прв да коментира...

Остави коментар