Славески: Треба да се актуализира прашањето за личен банкрот

Како и многупати досега, повторно на маса се стави идејата за озаконување на можноста за личен банкрот. Имено, на денешната работна средба во Стопанската комора, гувернерот на Народната банка, Трајко Славески, рече дека не може до бесконечност да се толерираат луѓе што не во состојба да ги намируваат своите обврски, отворајќи ја можноста за дискусија за воспоставување регулатива со која би се овозможил личен банкрот.

„Тоа можеби е повеќе прашање за Министерството за финансии, но заедно може да размислиме дали е моментот да одиме со ваква регулатива – закон за личен банкрот. Според моите информации, имаме околу 120.000 блокирани сметки, граѓани без пристап до финансиските институции. Тие се жртви на некои други даватели на кредити со високи камати, лихварски. Треба да се актуализира прашањето, јас одамна го поставував и како министер за финансии, дали не е време да донесеме закон за личен банкрот, кој би решил некои прашања. Не може до бесконечност да се толерира таква ситуација – луѓе што не можат да ги намируваат своите обврски, а тие се зголемуваат со каматите на долгот“, одговори гувернерот на новинарско прашање.

Додека во многу земји во светот можноста за личен банкрот функционира на тој начин што на физичките лица што се презадолжени им обезбедува шанса за нов почеток со индивидуално приспособен план за раздолжување, кај нас и натаму останува невозможна опција.

Веќе долги години гласно се зборува за потребата од воведување личен стечај во македонското законодавство, па тоа го гледавме дури и како ветување во предизборни програми, а беше дел и од програмата за работа на претходната влада. Но не само што досега не резултира со плод туку надежите се целосно уништени, со оглед на тоа што оваа можност нема да се земе предвид ниту со следните законски измени.

„Блумберг Адрија“ неодамна ја анализираше можноста за воведување личен стечај и што конкретно значи тоа. Тогаш, од Министерството за економија и труд посочија дека при изработката на новиот закон за инсолвентност, кој се планира да биде донесен во четвртиот квартал од годинава, се разгледувала и можноста за воведување личен стечај.

„По направената консултација со другите институции се заклучи дека сѐ уште не се сoздадени административно-институционални, но пред сѐ општествено-социјални услови за креирање на регулативата и особено нејзина адекватна примена во државата во областа на личен стечај“, рекоа од Министерството за економија и труд во одговор за „Блумберг Адрија“.

Разговарајќи со повеќе инволвирани страни, заклучокот е дека овозможувањето личен стечај е многу повеќе од само голо носење закон. Потребни се системски решенија, што ќе го гарантираат неговото спроведување во практика, без притоа да се остави можност за злоупотреба. Анализата може да ја прочитате на овој линк.

Во моментов нема коментари за веста. Биди прв да коментира...

Остави коментар