Земјите увозници се соочуваат со зголемени трошоци за основни производи од житарки до растителни масла, што сигнализира несигурност во однос на снабдувањето со храната.
Глобалната сметка за увоз на храна треба да се зголеми на рекордни 1,94 трилиони долари во 2022 година, околу 128,6 милијарди долари повеќе од предвиденото во јуни, бидејќи трошоците за производство растат и синџирите на снабдување се нарушени, соопшти организацијата за храна и земјоделство на Обединетите нации (ФАО). Многу економски ранливи земји плаќаат повеќе, а добиваат помалку храна, предупреди агенцијата со седиште во Рим.
„Ова се алармантни знаци од перспектива на безбедноста во снабдувањето со храна, што укажува дека на увозниците им е тешко да ги финансираат зголемените меѓународни трошоци“, соопшти Одделението за пазари и трговија на ФАО.
Потрошувачката на увезени прехранбени производи продолжува да расте и покрај тоа што индексот на цените на храната на ФАО опаѓа седум последователни месеци, како одраз на падот на цените на суровините. Сметката за увоз на храна на ФАО вклучува широк спектар на производи од овошје и зеленчук до морска храна, какао, чај и зачини, како и пијалоци и основни производи како што се житарките и месото.
Увозот на храна ќе го надмине минатогодишниот врв за 180 милијарди долари, или за 10 отсто, при што растот во голема мера ќе биде поттикнат од земјите со висок и среден приход. Темпото на раст на таа сметка ќе се забави бидејќи повисоките цени и посилниот долар ја нагризуваат куповната моќ на земјите увозници, намалувајќи го обемот.
Вкупната сметка за увоз на храна за групата земји со ниски приходи се очекува да остане малку променета, иако се очекува пратките да се намалат за 10 проценти. Ова укажува на растечки проблем со непристапноста, соопшти ФАО.
Во меѓувреме, глобалната сметка за увоз на земјоделски производи како што се ѓубриво, гориво и семиња се очекува да скокне за 48 отсто на рекордни 424 милијарди долари следната година, објави ФАО.
.webp){kind=icon}
