Уште нема консензус во врска со темпото на малопродажба за време на викендот за распродажба кога беше т.н. „црн петок“, необичен исход што предизвикува различни прогнози за остатокот од празничната шопинг-сезона и создава несигурност за инвеститорите и аналитичарите за следната година.
Компаниите користат различни податоци за да ја пресметаат продажбата или да ги следат различните малопродажни сектори, но бројките од минатото обично покажуваат слични трендови.
„Ова е најнеубедливата година за црниот петок и податоците за празниците што сум ги видел“, рече Мелиса Минков, директорка за стратегија за малопродажба во дигиталната консултантска компанија CI&T.
Од „Сејлсфорс“ (Salesforce Inc), на пример, сметаат дека продажбата во САД преку интернет е зголемена за 10 проценти од Денот на благодарноста до т.н. сајбер-понеделник оваа година, споредено со лани, достигнувајќи речиси 52 милијарди долари. Но од „Адоб“ (Adobe Inc) велат дека продажбата на интернет во тој период се зголемила само за четири проценти.
„Се чини дека постои одреден договор дека растот на продажбата бил минимален за време на почетокот на празничната шопинг-сезона“, смета Минков. Но едни велат дека растот се должи на инфлацијата, додека други велат дека инфлацијата варира по категории, што создава тешкотии за да се определи влијанието на растот на цените врз конечната потрошувачка. Поголемиот дел податоци што ја следат продажбата на мало не се приспособени со инфлацијата бидејќи датираат од пред години, кога во САД имаше придушена инфлација. Во ноември стапката на инфлација изнесуваше 7,1 отсто.
Од „Сејлсфорс“ велат дека високата инфлација го објаснува поголемиот дел од зголемувањето на приходите од онлајн малопродажбата на црниот петок, така што реалниот раст на продажбата би бил приближно ниско едноцифрен. Во меѓувреме, „Адоб“ вели дека неговата анализа покажува дека цените во е-трговијата благо паднале во ноември, така што зголемените потрошувачки трошоци тој месец биле водени и од новата нето-побарувачка, а не само од повисоките цени.
„Економијата е во состојба што е збунувачка за сите. Дури и благ пад на продажбата на мало треба да се смета за победа поради високата инфлација и загриженоста за рецесија во САД за следната година“, рече Минков.
Bloomberg Mercury
Има и спротивставени податоци за резултатите во физичките продавници за време на шопинг-викендот во црниот петок. „НПД груп“ соопшти дека продажбата во продавниците се намалила за пет проценти, што е во согласност со податоците од фирмата за аналитика „Плејсер“ (Placer.ai), кои покажаа пад на прометот, особено во американските трговски центри. Сепак, од трговското здружение Национална федерација за малопродажба (НРФ) велат дека прометот е зголемен за 17 проценти во петте дена од Денот на благодарноста до сајбер-понеделникот.
НРФ предвидува вкупен раст на продажбата (и преку интернет и во продавниците) меѓу шест и осум проценти во однос на претходната година и смета дека инфлацијата нема да го намали тој раст.
„Нашите очекувања се дека ќе имаме реален раст, приспособен на инфлацијата за празничната сезона“, се вели во соопштението на групата.
Земени заедно, разликите во податоците ја заматуваат сликата за последниот дел од празничната шопинг-сезона и за 2023 година.
„Трговците на мало се соочуваат со неизвесност повеќе отколку во минатите години и не знаат како ќе изгледа првото полугодие од 2023 година“, вели Мет Кац, партнер во консултантската компанија SSA & Co.
„Перформансите на малопродажната индустрија во текот на црниот петок покажаа дека побарувачката за облека, додатоци и други артикли слабее“, смета тимот на аналитичари од UBS AG, предводен од Џеј Соле. Тој тренд се влоши во наредните недели.
„Подготвеноста на потрошувачите во САД да трошат се намали речиси за 16 проценти во декември, споредено со истиот период од претпандемиската 2019 година“, велат аналитичарите во извештајот објавен месецов. Тоа е најголемиот пад од почетокот на ковид-кризата. Според Соле, мал дел од потрошувачите вели дека штеди доволно, а поголемиот дел од нив се чувствува финансиски несигурно или многу несигурно.
„Гледаме и зголемен ризик дека зголемувањето на каматните стапки на ФЕД ќе се покаже поштетно за потрошувачката отколку што се очекуваше. За индустријата за облека и додатоци, новите податоци сигнализираат дека трендот на продажба ќе се влоши“, вели Соле.
.webp){kind=icon}
