text size
Инфлацијата останува голем предизвик за креаторите на монетарните политики во светот, изјави висок функционер на Меѓународниот монетарен фонд (ММФ), откако заемодавецот ги зголеми изгледите за глобален економски раст за првпат во последната година.
„Ние сме далеку од победата во борбата против инфлацијата. Имавме неколку добри податоци. Тоа е охрабрувачко и во вистинската насока“, рече главниот економист на ММФ, Пјер-Оливие Гуринчас, во денешното интервју за телевизијата Блумберг.
Гуринчас зборуваше од Сингапур веднаш по објавувањето на кварталните прогнози на фондот, кои покажуваат дека глобалната економија оваа година ќе порасне за 2,9 проценти, што е повисоко од нивната октомвриска процена за раст. „Сè уште ќе биде предизвикувачка година, со раст под просекот од изминатите две децении и инфлација што само што почна да се намалува од својот врв, додека основните цени би можеле да останат тврдоглаво високи,“ додаде тој. За 2024 година ММФ предвидува глобален раст од 3,1 отсто.
Според извештајот со коригирани проекции на ММФ, САД годинава ќе забележат раст од 1,4 отсто, што е значајно зголемување од октомвриското прогнозирање за раст на американската економија од 0,4 проценти за годинава. А, за 2024 година ММФ предвидува раст во САД од еден отсто.
И за еврозоната прогнозата на ММФ е подобрена за половина процент, со тоа што сега Фондот очекува раст од 0,7 проценти во 2023 година, за разлика од претходно очекуваните 0,2 отсто, додека за 2024 година растот би бил 1,6 процент.
Глобалната вкупна инфлација го достигна врвот минатата година, проценува ММФ. Фондот прогнозира дека 84 отсто од земјите треба да имаат пониска вкупна инфлација оваа година, споредено со минатата, додека до 2024 година и главните и основните мерки за инфлација веројатно ќе останат над нивото пред пандемијата во сличен удел на економиите.
Како и да е, економиите во развој треба да растат со стапка од четири отсто оваа година и 4,2 проценти следната година, што е за околу трипати побрзо од темпото на држави со напреден пазар.
Кина и Индија се истакнуваат меѓу пазарите во развој, при што втората по големина економија во светот ќе расте со стапка од 5,2 отсто оваа година и 4,5 проценти во следната, откако во 2022 година забележа раст од три проценти. ММФ тврди дека Индија ќе порасне за 6,8 отсто во тековната година, која завршува во март, за во следниот период да забележи раст од 6,1 отсто и потоа повторно да се врати назад на ниво од 6,8 проценти.
„Од ноември, доларот ослабе и обезбеди свеж воздух за многу економии на пазарите во развој со помалку затегнати финансиски услови и увезени инфлациски притисоци“, рече Гуринчас.
Отпорноста во заштедите на домаќинствата, олеснувањето на цените на енергијата, тесните пазари на трудот и повторното отворање на Кина се меѓу позитивните фактори. Во исто време, ММФ предупреди дека војната во Украина би можела да ги загрози тие посветли процени, а геоекономската фрагментација во форма на напори за повторно зајакнување и поддршка од страна на пријателите останува длабок извор на загриженост за ММФ.
.webp){kind=icon}
