Сè поголем број луѓе купуваат користена облека, обувки и модни додатоци, со што индустријата за половни производи минатата година достигна глобална продажба во вредност од 177 милијарди долари, пишува во новиот извештај на онлајн пазарот за користени производи „Тредап“ (ThredUp Inc).
Тоа претставува раст од 28 проценти во однос на 2021 година, благодарение на зголемената инфлација и на тоа што повеќе трговци на мало ја развиваат продажбата на производи од втора рака, како и поради зголемената свест за одржливите навики за купување.
Доаѓа и дополнителен раст. Извештајот на „Тредап“, кој се базира на истражувања и податоци од аналитичката компанија за малопродажба „Глобал дата“ (GlobalData), предвидува дека индустријата за користени производи до 2027 година практично ќе се удвои на 351 милијарда долари во светски рамки.
„Јасно е дека препродажбата не е мода“, изјави коосновачот и главен извршен директор на „Тредап“, Џејмс Рајнхарт, во интервју за „Блумберг грин“ (Bloomberg Green). Иако потрошувачите ја наведуваат вредноста како причина за купувањето од втора рака, Рајнхарт рече дека брендовите исто така ја гледаат препродажбата како сè поважна за нивната агенда за одржливост.
„Кога разговарам со брендовите денес, не е веќе прашање дали тие ќе бидат вклучени во препродажбата, туку како“, рече тој.
Модните компании што сакаат да ги намалат своите емисии на стакленички гасови, како и нивните отпадоци од пластика, може да се обидат да ги решат тие проблеми истовремено потпирајќи се на натамошна употреба на своите постојни производи преку препродажба и обезбедувајќи дополнителен прилив на приходи.
Сè уште е отворено прашањето дали порастот на половни и други „кружни“ деловни модели ќе доведе и до намалување на бројот на нови артикли што се произведуваат или до пад на побарувачката на потрошувачите за нови стоки.
Купувачи што најмногу ги привлекува препродажбата се припадниците на помладите генерации, главно генерацијата зед (Gen Z). Според истражувањето на „Глобал дата“, спроведено на околу 3.000 возрасни лица во САД, 83 отсто од испитаниците на генерацијата зед изјавиле дека веќе купиле облека од втора рака или дека се подготвени за таков шопинг.
„Тоа дефинитивно е спорт за млади луѓе“, рече Рајнхарт. Истата група потрошувачи во голема мера го поттикна растот на брза и ултрабрза мода, што помага да се објасни зошто дури и големите компании што ја следат брзата мода сега прифаќаат да продаваат производи од втора рака и во продавници и онлајн.
.webp){kind=icon}