Мекарти ги паузираше разговорите за горната граница на долгот на САД

Преговорите за максималната граница на долгот денеска заглавија во ќор-сокак, бидејќи претседателот на Претставничкиот дом, Кевин Мекарти, ја обвини Белата куќа за отпор во врска со кратењата на трошоците, фрлајќи сомнеж врз напорите во Вашингтон да се спречи катастрофално неплаќање.

Мекарти зборуваше кратко откако неговите избрани преговарачи ненадејно ги напуштија разговорите со претставниците на Белата куќа, што беше пресврт од оптимистичкиот став на републиканскиот лидер дека договор може да се постигне уште викендов. Неуспехот го оптовари Волстрит, каде што акциите се лизнаа по ваквите вести.

„Мора да ја раздвижиме Белата куќа, а оттаму не се прави ниту чекор. Значи, да, мора да паузираме“, рече Мекарти, кој лично не присуствуваше на состанокот.

„Видете, тие се едноставно неразумни“, рече републиканскиот преговарач Гарет Грејвс по неколку мига откако ја напушти седницата. Коментарите на Грејвс дојдоа еден ден откако Мекарти рече дека би можел да види постигнување договор со гласање во Претставничкиот дом уште следната недела.

Некарактеристично оптимистичките коментари на Мекарти вчера во врска со изгледите за договор за лимитот за задолжување на САД ги зголемија акциите, при што индексот S&P 500 достигна највисоко ниво во последните девет месеци, затворајќи на 4.200 бода.

Министерката за финансии Џенет Јелен сигнализираше дека неплаќањето може да стане ризик уште на 1 јуни. Но вестите за денешниот крах на преговорите предизвикаа пад на акциите, при што S&P 500 во еден момент изгуби речиси 0,8 проценти од највисокото ниво на денешната сесија, иако падот подоцна беше умерен. Приносите на американските државни обврзници, кои достасуваат на почетокот на јуни, денеска продолжија да се искачуваат, покажувајќи загриженост за потенцијалните ризици од неисполнување на плаќањето.

Претходните пресметки за максималната граница на долгот се карактеризираа со слични прекини во преговорите, а некои набљудувачи очекуваа таков развој на настаните и во тековната битка. Тобин Маркус од „Евркор“ (Evercore ISI) вчера им напиша на клиентите: „Ги предупредуваме инвеститорите да не преценуваат колку брз или рамен ќе биде патот до целта“.

Грејвс рече дека не знае дали преговарачите ќе се сретнат повторно за време на викендот. Официјален претставник на Белата куќа ги призна разликите меѓу двете страни и рече дека разговорите ќе бидат тешки, но дека сè уште е можен договор.

„Доколку тие не се подготвени да водат разумни разговори за тоа, како вие всушност можете да продолжите напред и да ја направите вистинската работа? Ние нема да седиме овде и да разговараме со себе“, рече Грејвс.

Учесниците на пазарот предупредија на пораст на трошоците за позајмување и удар врз акциите во случај на какво било неисполнување на обврските, со ефект за глобалната економија што би можел да се мери со падот во 2008 година. Републиканците притискаат за големо намалување на трошоците, заедно со регулаторни промени, на кои демократите се спротивставија. Повеќемесечниот ќор-сокак меѓу двете страни, откако Министерството за финансии ја достигна горната граница на долгот во јануари, поттикна зголемени предупредувања од економистите за штетна рецесија во случај состојбата да продолжи да ескалира.