Најголемите банки од американските берзи го поминаа годишниот стрес-тест на Федералните резерви (ФЕД), клучен параметар по кој овие банки можат да им вратат милијарди долари на инвеститорите.
Во тестот, 23-те најголеми американски банки покажаа дека можат да издржат тешка глобална рецесија и превирања на пазарот на домување, објави ФЕД во средата. Критериумите за годинашниот стрес-тест, кој помага да се одреди колкави резерви треба да имаат банките, беа објавени пред регионалните банкарски превирања во март.
Годишниот тест будно го следи и финансиската индустрија, каде што успешното исполнување на барањата може да им даде зелено светло на банкарските гиганти да им исплатат милијарди долари на инвеститорите. Сепак, годинашните резултати можеби нема брзо да донесат најави за дивиденда и откуп на акции, бидејќи многу банки предупредија дека ќе ги одложат овие чекори додека не се добијат повеќе детали за новите барања во однос на капиталот. Во ФЕД, од каде што соопштија дека банките можат да почнат да ги објавуваат своите планови за исплата в петок, исто така размислуваат за ревидирање на параметрите.
Сепак, резултатите ги поддржуваат тврдењата дека банкарската индустрија е стабилна и добро капитализирана. Директорите на банките, вклучувајќи го и извршниот директор на „ЏП Морган“ (JPMorgan Chase & Co.), Џејми Дајмон, тврдат дека зголемувањето на сумата на пари што компаниите треба да ги издвојат како резерва ќе оди на штета на кредитирањето.
Џејми Дајмон
Bloomberg
Годинашното хипотетичко сценарио вклучуваше пораст на стапката на невработеност во САД на 10 отсто, пад на цените на комерцијалните недвижности за 40 отсто и пораст на доларот во однос на повеќето главни валути. За првпат, осумте најголеми американски банки, вклучувајќи ги „ЏП Морган“ , „Голдман Сакс“ (Goldman Sachs Group Inc.) и „Морган Стенли“ (Morgan Stanley), се соочија со „експериментален пазарен шок“ во своите сметководствени книги. Главните проблеми во хипотетичкото сценарио се инфлаторните притисоци и зголемувањето на каматните стапки.
„Овој стрес-тест е само еден начин да се измери таа сила“, рече во изјавата Мајкл Бар, потпретседател на надзорниот комитет на ФЕД. „Треба да останеме скромни за тоа како може да се појават ризици и да продолжиме да работиме за да се осигуриме дека банките се отпорни на низа економски сценарија, пазарни шокови и други стресови“, додаде тој.
Резултатите од новите фактори на ризик на кои банките беа тестирани нема да се користат за поставување нови капитални барања, туку ќе им помогнат на регулаторите да ги разберат ризиците за тргување и да се подготват за потенцијално тестирање на банките во однос на повеќе сценарија во наредните години. Банката на федерални резерви посочи дека вежбата покажала оти „билансите на големите банки се отпорни во тестирана средина на зголемени каматни стапки“. Брзиот пораст на трошоците за задолжување беше делумно виновен за колапсот на банката „Силикон валеј“ (СВБ).
.webp){kind=icon}
