Вилијамс: Фед ќе ги намали каматните стапки дури следната година

Претседателот на њујоршката филијала на Федералните резерви (Фед), Џон Вилијамс, прогнозира дека американската монетарна политика ќе биде рестриктивна „уште некое време“. Централниот банкар, исто така, вели дека намалувањето на каматите би можело да биде оправдано следната година доколку инфлацијата забави.

„Монетарната политика е добро поставена - стапките се онаму каде што сакаме“, рече Вилијамс во интервју за „Њујорк тајмс“ објавено во понеделникот. „Која ќе биде највисоката референтна каматна стапка и колку долго ќе остане на тоа ниво ќе зависи од податоците“, додаде тој.

„Очекувам дека ќе мора да одржуваме рестриктивни политики некое време“, посочи Вилијамс, пренесе „Тајмс“.

Покачувањето на каматните стапки на Фед во јули ја доведе референтната стапка на опсег од 5,25 до 5,5 отсто, што е највисоко ниво во последните 22 години. Средната вредност на најновите квартални проекции на Фед, објавени во јуни, покажа дека централните банкари очекуваат уште две зголемувања оваа година. Едното веќе беше спроведено во јули.

Потребата за повеќе зголемувања на стапките останува „отворено прашање“, смета Вилијамс. Ако стапката на инфлација продолжи да паѓа, централната банка можеби ќе треба да ги намали каматните стапки во 2024 или 2025 година за да се осигура дека реалните камати нема дополнително да се зголемуваат.

Клучните мерачи на американската инфлација покажуваат забавување, а Фед ги одржува стапките на сегашното ниво, така што реалните стапки растат, што „нема да биде во согласност со целите на централната банка“, рече Вилијамс.

Според неговата проекција, инфлацијата во следните две години ќе се врати на целта од два отсто, а економијата ќе биде во подобра и порамномерна позиција.

„На крајот на краиштата, на монетарната политика ќе ѝ требаат следните неколку години за да се врати на понормални (што и да е тоа нормално) ставки“, изјави Вилијамс за „Тајмс“.

Во моментов нема коментари за веста. Биди прв да коментира...

Остави коментар