„Ес енд пи“ го намали кредитниот рејтинг на неколку американски банки

Две недели откако „Мудис“ (Moody's Investors Service) ги разниша финансиските акции со намалување на рејтингот на голем број американски банки, „Ес енд пи глобал рејтингс“ (S&P Global Ratings) исто така одлучи да го намали рејтингот на неколку американски заемодавци.

„Ес енд пи“ го намали рејтингот на „Кејкроп“ (KeyCorp), „Комерика“ (Comerica), „Валеј нешнл банкорп“ (Valley National Bancorp), УМБ (UMB Financial Corp.) и „Асошиејтед банк-корп“ (Associated Banc-Corp.), се истакнува во соопштението од понеделникот, во кое како причина се наведуваат влијанието на повисоките каматни стапки и движењето на депозитите низ индустријата.

Од „Ес енд пи“ исто така ги намалија рејтинзите на „Ривер сити банк“ (River City Bank) и „СТ банк“ (S&T Bank) на негативни и додадоа дека нивниот став за „Зајонс“ (Zions Bancorp) останува негативен по ревизијата.

Многу штедачи „ги префрлија своите средства на сметки со повисоки камати, зголемувајќи ги трошоците за финансирање на банките. Падот на депозитите ја намали ликвидноста на многу банки, додека вредноста на нивните хартии од вредност – кои сочинуваат голем дел од нивната ликвидност – падна“, пишува во белешката од „Ес енд пи“.

„Мудис“ претходно месецов го намали рејтингот на 10 американски банки и предупреди дека може да намали и други како дел од опсежната ревизија поради зголемените притисоци на индустријата.

Индексот KBW на најголемите американски банки оттогаш падна за речиси 7 проценти - движејќи се кон своите најлоши месечни перформанси од колапсот на три регионални банки во март, што предизвика широка распродажба.

Зголемувањето на каматните стапки на Федералните резерви (Фед) врши притисок врз многу мали и средни банки што со години плаќаа премалку за да привлечат депозити од клиенти што финансираат заеми и други средства на нивните биланси. Потрошувачите и бизнисите сега имаат повеќе можности да заработат повисоки приноси на друго место. Тоа довело до пад на бескаматните депозити за 23 отсто во последните пет квартали, според „Ес енд пи“.

Bloomberg

Како што се одлева готовината, банките можат или да ја заменат со поскапи форми на финансирање, како што се посредувани депозити, или да ги намалат своите биланси со продажба на средства создадени во средина со пониски стапки, забележувајќи загуби.

Во секој случај, заработката сè повеќе се намалува.

Овие притисоци се очекува да поттикнат повеќе банки да ги здружат силите за да ги зајакнат своите финансии. Во јули, регионалниот заемодавец „Паквест“ (PacWest Bancorp) со седиште во Беверли Хилс, кој продава средства за да ја зголеми ликвидноста, се согласи на продажба на помалиот конкурент „Банк оф Калифорнија“  (Banc of California) за да ги надмине финансиските проблеми.

Федерално осигурените банки имаа повеќе од 550 милијарди долари нереализирани загуби на своите достапни за продажба и чувани до достасување хартии од вредност до средината на годината, соопшти „Ес енд пи“.

Гледајќи напред, ситуацијата би можела да се влоши за банките доколку Фед ги задржи каматните стапки високи подолго од очекуваното - дополнително намалувајќи ја вредноста на заемите на должниците на кои им е потребно рефинансирање.

„Иако многу показатели за квалитетот на средствата сè уште изгледаат бенигно, повисоките стапки вршат притисок врз должниците. Банките со значителна изложеност на комерцијални недвижности, особено канцелариски заеми, би можеле да имаат најмногу проблеми“, заклучува „Ес енд пи“.

Во моментов нема коментари за веста. Биди прв да коментира...

Остави коментар