Банката на Јапонија (БоЈ) би можела да ги зголеми каматните стапки уште двапати годинава, но треба да се воздржи директно да реагира на слабиот јен, вели Такатоши Ито, професор на универзитетот „Колумбија“.
„Можно е стапката да се зголеми на 0,25 отсто, а потоа и 0,5 отсто годинава“, рече тој во четвртокот во интервју за „Блумберг“. „БоЈ е во таков циклус на зголемување на стапките што не е ниту премногу брз ниту премногу бавен. Ако инфлацијата е два отсто, природно е стапката да се искачи на тоа ниво“, вели Ито.
Забелешките на Ито - чие име беше споменато во контекст на потенцијалниот кандидат да го преземе кормилото на БоЈ минатата година - го нагласуваат ризикот дека Банката на Јапонија ќе преземе поагресивен пристап кон монетарната политика отколку што проценуваат повеќето набљудувачи во моментов.
Тие очекуваат БоЈ да направи уште едно покачување, над сегашниот опсег од нула до еден процент, откако во март ги зголеми стапките за првпат по 17 години.
Иако има шпекулации дека банката ќе почне да ги зголемува стапките порано поради слабиот јен, Ито предупредува на таквата акција, велејќи дека тоа може да предизвика нови проблеми. „За да се доведе јенот , да речеме, на нивото од 135, колку треба да се зголемат стапките? Еден процентен поен не би бил доволен. Веројатно ќе даде плод ако банката ги зголеми каматните стапки за два процентни поени, но тоа ќе има значително негативно влијание врз домашната економија“, вели Ито.
Јенот рано во четвртокот падна на најниско ниво во последните четири недели, од 157,71 за долар, нивото што го поттикна последниот круг интервенции за кои се шпекулираше. Ито, кој работеше под лидерство на поранешниот шеф на БоЈ, Харухико Курода, кога беше главен функционер за валута, рече дека интервенциите на Јапонија (што веројатно се случија) на 29 април и 2 мај беа успешни во спречувањето на јенот да пропадне преку клучниот праг од 160.
БоЈ го планира својот следен состанок за монетарната политика на 14 јуни. Со оглед на тоа што повеќето економисти очекуваат одборот да ги задржи стабилните стапки, клучниот фокус ќе биде на какви било промени во купувањето обврзници или на какви било коментари што сугерираат квантитативно затегнување.
Некои економисти веруваат дека овој пат БоJ веројатно ќе одлучи да го забави темпото на купување обврзници за околу 38 милијарди долари месечно, со цел да го намали притисокот врз јенот.
„Не сум сигурен дали квантитативното затегнување е нешто што треба да се објави. БоЈ веројатно нема да објавува колку ќе олеснува секој месец, како што направија САД“, рече Ито. „Веројатно размислуваат пофлексибилно да го променат обемот на купувања, без да се оптоваруваат со износот од шест трилиони јени. Сакаат да го намалат, сè додека приносите на обврзниците не реагираат остро (на промената)“, додава тој.
Приносите на десетгодишните јапонски обврзници продолжија да растат во четвртокот, достигнувајќи 1,1 отсто, што е највисоко ниво од јули 2011 година. БоЈ треба в петок да го објави својот план за купување обврзници за јуни. Ито рече и дека постепеното зголемување на приносите до 1,5 отсто нема да предизвика голем проблем за економијата во целина, а најголем предизвик за стабилизирање на Банката на Јапонија останува инфлацијата.
Дури и сега, кога повеќедеценискиот начин на размислување на Јапонија е променет, во смисла на немање инфлација или раст на платите, БоЈ сè уште е во процес на зголемување на проекциите за да биде во согласност со целта од два процента, со ослабени ризици по продолжената дефлација, рече Ито.
„Цените на услугите, како што е киријата, не се многу зголемени. Не би рекол дека ќе се зголемат цените на услугите што досега не се намалени“, заклучи тој.
.webp){kind=icon}
