Смртоносната експлозија во Кореја ја оживува загриженоста за безбедноста на батериите

Смртоносниот пожар што избувна во фабрика ја оживеа загриженоста за безбедноста на батериите во Јужна Кореја, клучниот глобален снабдувач на литиумјонски ќелии што се користат во сè, од електрични возила до системи за складирање енергија.

Во пожарот и серијата експлозии во фабрика за литиумски батерии во понеделникот јужно од Сеул загинаа 22 работници, а осум беа повредени, соопшти владата. Иако во фабриката се произведуваа примарни литиумски ќелии, кои се направени за еднократна употреба и отстранување, пожарот може да го влоши расположението во земјата кон целата индустрија, каде што ова не е прв ваков пожар во текот на годините.

„Навистина е фрустрирачки. Слушаме луѓето велат дека ова може да биде поврзано со батериите за електрични возила (ЕВ), но секако мора да се знае дека тие не се батерии што се полнат“, рече Банг Сунгјонг, главен извршен директор во „Гринерџи“ (Grinergy), стартап што произведува литиумтитаниумски ќелии. „Инцидентот, сепак, сè уште може да има значително влијание врз расположението кон индустријата за батерии за ЕВ и покажува зошто треба да развиеме технологии за побезбедни батерии“.

Иако корејските доставувачи на батерии „ЛГ Енерџи солшн“ (LG Energy Solution Ltd.), „СК Он“ (SK On Co.) и „Самсунг СДИ“ (Samsung SDI Co.) го водат глобалното производство на енергетски ќелии, тие се мачеа да распоредат системи за складирање енергија (ESS) низ целата земја поради серија пожари. Додека владата воведе построги регулативи, честите несреќи го забавија инсталирањето, што е од клучно значење за да се направи соларната и ветерната енергија посигурна и сеприсутна.

Пожарите поврзани со батерии носеа поголеми ризици во последниве години, бидејќи земјите се оддалечуваа од фосилните горива и ја прошируваа употребата на чиста енергија и возила. Зголемената побарувачка го зголеми бројот на производители на батерии низ светот, а пожари избувнуваат насекаде, од САД до Австралија.

Корејската влада одговори на последниот пожар со формирање панвладина работна група во која се вклучени и цивилни експерти, за да се направат фундаментални подобрувања на мерките за заштита од пожари, објави „КБС ворлд“ (KBS World) во вторникот.

„Веста за експлозијата во Кореја ја врати важноста на безбедноста во индустријата додека таа се шири“, рече Робин Зенг, претседател на „Контемпорери амперекс технолоџи“ (Contemporary Amperex Technology Ltd). Тој додаде дека е загрижен што има толку многу играчи во секторот, што значи дека некои немаат технологија за решавање на нивните безбедносни проблеми.

„Кога милиони луѓе користат батерии, ако батериите не се доволно безбедни, тоа ќе предизвика многу проблеми“, рече тој на настанот на Светскиот економски форум во Далијан, Кина, во вторникот.

Пожарот избувнал во понеделникот околу 10:30 часот во трикатната фабрика во Хвасеонг, на околу 45 километри јужно од Сеул. Повеќето од жртвите се работници мигранти од Кина.

Акциите на „С конект“ (S Connect Ltd.) која поседува 96 отсто од „Арисел“ (Aricell), каде што избувна пожарот, паднаа за 23 отсто во понеделникот.

 

Во моментов нема коментари за веста. Биди прв да коментира...

Остави коментар