.webp){kind=icon}
Се врати т.н. „липстик индекс“ (Lipstick Index). Се работи за термин измислен од Леонард Лаудер, поранешен претседател на Estée Lauder, за време на рецесијата во 2001 година. Тој забележал дека продажбата на кармин се зголемила есента истата година, што покажува дека жените во несигурно економско опкружување се вртат кон производите за убавина како прифатливо задоволство.
Потоа, финансиската криза од 2008-2009 година го поттикна т.н. Foundation Index затоа што на жените тогаш приоритет им беше беспрекорната кожа.
Сега подгответе се за „парфем индексот“ (Perfume Index) или можеби за ефектот Bouncy Blowout. Продажбата на мириси или производи за нега на коса можеби повеќе ја одразува транзицијата на потрошувачите од екстравагантни купувања кон поевтини задоволства во ерата по пандемијата.
Да бидеме појасни, продажбата на шминки цвета. Додека маските паѓаат, продажбата на кармини доминира - и во САД и во Европа, односно на мејнстрим и премиум пазарите.
Индекс на кармини | Карминот е една од најбрзорастечките категории на козметика / Bloomberg
Но, побарувачката за козметика не е ограничена само на кармин. Природната естетика на „чиста девојка“, која се карактеризира со блескава кожа, предизвика интерес за нова шминка, како и за сè попопуларниот подраматичен изглед, кој се карактеризира со смели шминки во боја и накит како од ТВ серијата „Еуфорија“ (Euphoria).
Соочување со светот | Повторното отворање ја зголемува побарувачката за шминка / Bloomberg
Многу потрошувачи ги занемарија своите несесери за шминка додека престојуваа дома за време на пандемијата, исто како што тоа го правеа и со нивната облека. Негата на кожата, која неколку години ја надминуваше шминката, стана уште поважна. Но, штафетата на убавината сега се враќа кај козметиката во боја.
Празничен сјај | Трговците на мало многу се обложуваат на шминка за празничната сезона / Bloomberg
Економските причини играат улога. И покрај падот на довербата на потрошувачите, продажбата порасна. А на убавината помалку влијаат зголемените влезни трошоци. Освен пакувањето, енергијата е релативно мала компонента во производството на шминка, а производите заземаат малку простор во скапите транспортни контејнери. Со додавање на душекот од масни маржи, просечната цена на производите за убавина од висока класа во САД се зголеми за само два отсто на годишно ниво, помеѓу јануари и 27 август, според NPD Group. Споредете го тоа со вкупната инфлација од 10,9 отсто кај храната и 5,1 отсто кај облеката во јули во САД.
Сето ова ја прави убавината попристапен луксуз. И иако многу клиенти посегнуваат по кармин, други се вртат кон парфемите.
„Го нарекуваме 'индекс на мирис' или 'ефект на мирис'“, изјави неодамна пред инвеститорите главниот извршен директор на Coty, Сју Наби. Компанијата не гледа знаци за пад во тргувањето. Всушност, потрошувачите на пазарот од повисоко ниво се префрлаат на поконцентрирани верзии од пожелни мириси, објаснува таа. Расте и продажбата на мириси во Estée Lauder, L'Oréal и во американската продавница Ulta Beauty.
Smells Like Free Spirit | Продажбата на мириси силно порасна во Estée Lauder во последната фискална година / Bloomberg
Побарувачката е помогната од фактот што потрошувачите купуваа мириси преку интернет за време на пандемијата. Гигантите од индустријата за убавина веќе почнаа да го префрлаат својот акцент од мирисите на славните на персонализираните парфеми кои ги привлекуваа купувачите од генерацијата Y и Z. Мирисите станаа начин луѓето да го подигнат својот дух додека престојуваат дома - уште еден дел од рутината на лична нега, кој исто така имаше корист од бумот на негата за кожа.
Но, за разлика од побарувачката за креми и маски за лице, повторното отворање беше добро за продажба на мириси. Сè помалку луѓе имаат време за рутина во 10 чекори за нега на кожата, но има повеќе причини да се обнови залихата на мириси по враќање од работа или забава. Се забележуваат и промени во вкусот. На пример, додека продажбата на машки мириси се зголеми за 21 отсто на годишно ниво во Европа помеѓу јануари и јули, лосионот за после бричење останува непрменет, според ИРИ.
Дизајнерските парфеми традиционално се влезна точка во производите од високата класа. Патиките и уличната облека донекаде го презедоа водството, но со оглед на тоа што инфлацијата ги потиснува маргиналните купувачи, улогата на мирисите може да забележи заживување. Не можете да си дозволите чанта Prada? Тогаш што велите за шишенце од неjзиниот нов парфем Paradoxe?
Овие трендови се очекува да продолжат бидејќи патната малопродажба продолжува да закрепнува, зимските празници ја зголемуваат продажбата на подароци, а кинеските потрошувачи купуваат повеќе мириси.
Scentsational | Иако азиската продажба на мириси заостанува зад негата на кожа, тие се подготвени силно да се прошират од малата база / Bloomberg
Уште една разлика во споредба со претходните периоди на економска несигурност е експлозијата на врвната нега за коса. Оваа категорија вклучува брендови како што се Kérastase на L'Oréal, Olaplex Holdings, кој котира на американската берза и омилениот на Кардашијан - Ouai, кој беше купен од Procter & Gamble кон крајот на минатата година. Повторно дружење значи поголема потреба од производи за обликување на косата. Во исто време, потрошувачите не се откажаа од третманите, како што се маските за коса, што ги открија за време на заклучувањето.
Косата денес | Негата за коса е најбрзорастечката премиум категорија за убавина во САД / Bloomberg
Негата на косата доби огромен поттик од социјалните мрежи. Има бескрајни TikTok видеа за тоа како да имате совршени шишки, на пример. Неприкосновена ѕвезда на „HairTok“ е уредот Dyson Airwrap. Но, со цена од повеќе од 500 долари, тоа е далеку од достапно задоволство. Шишенце масло Olaplex од 30 долари е поевтин начин да имате сјајна коса. Така, не е изненадување што продажбата на Olaplex се зголеми за речиси 40 отсто во вториот квартал. Друга област на која треба да се обрне внимание е боењето на косата дома, бидејќи сè повеќе жени ги заменуваат посетите во салон или го продолжуваат времето помеѓу посетите.
Dyson Airwrap е ѕвезда на 'BeautyTok', но неговата цена е далеку од прифатлива / Bloomberg
Социјалните мрежи ќе играат голема улога во одредувањето кои категории ќе имаат корист од „ефектот на кармин“. Ова претставува предизвик за производителите и продавачите на производи за убавина, бидејќи ако производот стане вирален, тие може да се соочат со пораст на побарувачката. Како пример може да се посочи карминот Black Honey од Clinique. Станува збор за нијанса лансирана уште во 1971 година, но минатата година стана TikTok сензација, предизвикувајќи побарувачката да ја надмине понудата.
Но, за врвната убавина, тоа не може да биде лоша работа. Како и во луксузната индустрија, понекогаш недостигот е токму она што е потребно за да ги излуди потрошувачите, а „липстик индексот“ да порасне.
