Терминските цени на американските и европските акции паднаа заедно со азиските додека трговците го чекаат извештајот за вработување во САД, кој треба да биде објавен подоцна во текот на денов и кој треба да ги даде насоките за натамошно дејствување на Федералните резерви (ФЕД).
Индексот S&P 500 падна за 0,1 процент, додека Nasdaq 100 порасна за исто толкава вредност.
Индексот за азиските акции падна за првпат во последните четири дена, предводен од Јапонија, каде што петдневниот раст на јенот го зголеми притисокот за пад на акциите. Членот на управата на јапонската централна банка сугерираше потреба за процена на политиката, што претставува дополнително негативно расположение.
До пад на договорите за S&P 500 дојде откако индексот падна во текот на седницата во САД. Индексот заздраве претходно во текот на оваа недела, по сигналот што претседателот на ФЕД, Џереми Пауел, го даде во врска со намалувањето на темпото на раст на каматните стапки.
Неодамнешната распродажба на доларот е прекината, а показателот за вредноста на американската валута беше блиску до најниската вредност во последните неколку месеци.
Обложувањата на инвеститорите дека стапката на централната банка сега ќе го достигне врвот паднаа под 4,9 отсто. Инаку, моменталната референтна вредност се наоѓа на ниво меѓу 3,75 и четири отсто.
Претседателот на ФЕД Њујорк, Џон Вилијамс, рече дека се потребни натамошни зголемувања за да се заузди инфлацијата. Загриженоста дека таквото заострување ги зголемува изгледите за рецесија стана поизразена по објавените податоци што покажуваат пад на американското производство во ноември за првпат од мај 2020 година.
Исклучително отпорниот пазар на работна сила во САД почнува да се лади, но денешниот извештај за вработување може да биде пресвртот што го посакуваат банкарите од ФЕД во својата борба со инфлацијата.
„Надлежните од ФЕД се многу загрижени поради спиралата на цените и платите“, вели Исак Пул, главен директор за инвестиции во „Ореана фајненшл сервисис“ (Oreana Financial Services Ltd).
„Тие сакаат да се уверат дека тука нема докази. А, реалноста е дека никаде во податоците нема вистински докази за спиралата на платите“, изјави тој за Блумберг ТВ.
Сара Пончек, финансиска советничка во „УБС прајват велт менаџмент“ (UBS Private Wealth Management), рече дека бројките за работни места и другите податоци може да почнат да се покажуваат како тренд во забавувањето на економијата.
„Имаше мали навестувања дека циклусот на зголемување на каматните стапки што го гледавме досега почнува да се филтрира низ економијата“, рече таа за Блумберг радио.
.webp){kind=icon}
Во моментов нема коментари за веста. Биди прв да коментира...