text size
Вложувањето 60 проценти од портфолиото во акции и 40 отсто во обврзници, создадено во овој сооднос за да го штити инвеститорот од падот на вредноста на овие средства истовремено, сепак не се покажа како правилно во годината што изминува.
Инфлацијата и зголемувањето на каматните стапки ги нарушија двете класи средства, а индексот на „Блумберг“ што ја следи мешавината 60/40 е намален за околу 17 отсто на годишно ниво. Дали овој концепт на инвестирање веќе има смисла? Некои од инвеститорските ветерани веднаш даваат потврден одговор, образложувајќи дека овој класичен пристап за инвестирање сè уште има долгорочна смисла и дека обврзниците се позиционирани да го вратат својот статус како добра противтежа на акциите.
Bloomberg
За долгорочните инвеститори, падот на вреднувањето на акциите и порастот на приносите на обврзниците во 2022 година сепак ја поставуваат основата за идни просечни приноси од 6,9 проценти на мешавината 60/40. Ваков став имаат и во „Лојтхолд груп“ (Leuthold Group), компанија за истражување на пазарот и управување со пари.
Последното нивно истражување го користеше индексот S&P 500(СП 500) како негова позиција за акции, но Кристин Бенц, директорка за лични финансии во „Морнингстар инк“, која е дел од истражувањето, вели дека делот на акции од портфолиото 60/40 не треба да биде целосно во американски акции.
„Секогаш мислам дека многу конвенционално се толкува оваа мешавина, но експертите немаат такви препораки, а и јас сигурно не би го направила така“, рече таа. „Повеќето инвеститори треба да имаат изложеност и на меѓународни акции“.
„Вангард груп“ (Vanguard Group), исто така, советува да се има трпение со стратегијата 60/40, забележувајќи во извештајот дека во пократки временски рамки не е толку невообичаено да се забележи пад на акциите и обврзниците заедно.
Од 1976 година, во просек има по еден месец кога се забележува пад на двете средства, покажа истражувањето. Но „инвеститорите никогаш не наишле на тригодишен период на загуби во двете класи, се вели во извештајот.
Трајна логика
„За некој што инвестира во портфолио 60/40 пет или повеќе години, логиката сè уште важи“, изјави Роџер Алиага-Дијаз, глобален шеф за портфолија во „Вангард“ и автор на извештајот. „Ако ги погледнете последните десет години, вклучувајќи ја и годинешната загуба, приносот е 6,5 отсто за некои одредници во 60/40, така што оваа мешавина во просек го прави она што треба да го направи - ви дава поврат од 6 до 7 проценти.
Капиталниот дел од репер-портфолиото на „Вангард“ има 36 проценти во американски акции и 24 отсто во меѓународни акции; делот од обврзниците има околу 22 процента во меѓународни обврзници заштитени со валутна клаузула и 19 отсто во американски посредни кредитни обврзници.
Некои инвестициски фирми се залагаат во мешавината од 60/40 за да се вклучат повеќе класи на средства, како што се алтернативните средства. Неодамнешниот извештај од фирмата за приватен капитал „ККР и Ко.“ (KKR & Co.) предложи инвеститорите да издвојат 40 отсто на акции, 30 проценти на обврзници и потоа 30 отсто на алтернативни средства, од кои најмалку 10 проценти треба да бидат друга опција.
Во друга опција се сметаат инвестициите во недвижностите и инфраструктурата што се поотпорни на инфлација, се тврди во извештајот, и треба да обезбедат подобри приноси приспособени на ризик на долг рок. ККР откри дека портфолиото 40/30/30 го надмина традиционалното 60/40 за 2,6 проценти во текот на 24-месечниот период до јуни.
.webp){kind=icon}
