Време на дивиденди: Убава пролет само за некои акционери

Пролетта е период во кој компаниите од Македонската берза ги сумираат резултатите од работењето во претходната година и одржуваат собранија на кои меѓу другото се одлучува по предлозите на менаџерите за распределба на добивката, односно за тоа дали и колкава дивиденда ќе им се исплати на акционерите. Анализиравме какви се дивидендните политики за 2022 година кај компаниите што го сочинуваат берзанскиот индекс МБИ10.

Анализата покажа дека некои акционери имаат причина да се радуваат, со оглед на тоа што ќе добијат дивиденди поголеми отколку во претходниот период, додека други ќе треба да почекаат подобри времиња или да го преориентираат својот капитал во други компании.

Шест компании од МБИ10 ја зголемија дивидендата

Од вкупно десет компании што го сочинуваат индексот МБИ10, шест одлучија да ја зголемат дивидендата за 2022 година во однос на претходната година. „Алкалоид“ ја зголеми дивидендата од 440 на 490 денари по акција, „Макпетрол“ од 3.000 на 3.300 денари по акција,  „ТТК банка“ од 46 на 67 денари по акција, „Македонијатурист“ од 120,1 на 129,8 денари по акција, „НЛБ банка“ од 738 на 2.431 денари по акција и УНИ банка од 219,7 на 282,9 денари по акција. „Гранит“ одлучи да исплати дивиденда за 2022 година од 36 денари, што е исто како и претходната година, додека намалување на износот на дивиденда има кај „Комерцијална банка“ и „Македонски телеком“.

„Комерцијална банка“ ја намали дивидендата од 620 на 500 денари по акција, што можеби дојде како изненадување за дел од акционерите, со оглед на тоа што станува збор за една од најсилните компании на берзата и воопшто во државата. Имено, „Комерцијална банка“ со години остварува милионски профити, а лани оствари добивка пo оданочување од 2,14 милијарди денари или околу 35 милиони евра. Сепак, ланскиот резултат е за 6,7 проценти помал во однос на претходната година, што веројатно е главна причина за намалувањето на дивидендата за 2022 година.

Двоцифрен принос научна фантастика

Еден од најрелевантните показатели за износот на дивидендата е таканаречениот дивиденден принос што покажува колкав принос ќе оствари имателот на акцијата доколку ја купи по пазарна цена и го оствари правото на дивиденда. Станува збор за едноставна математичка пресметка, која покажува колкав приход ќе се добие во однос на цената на акцијата. Имено, износот на дивидендата по акција се дели со цената на акцијата, а при пресметката се користи последната пазарна цена на крајот на периодот на кој се однесува дивидендата.

Компаниите од Македонската берза што го сочинуваат индексот МБИ10 не можат да се пофалат со многу високи приноси. За минатата година убедлив рекордер по овој показател е УНИ банка, со принос од 7,06 проценти. Кај повеќето компании приносот е под пет проценти, а забележително е дека кај дел од нив дивидендата носи нула принос.

Висината на дивидендата и приносот не треба да бидат пресудни показатели кога се решава дали ќе се инвестира во акции на одредена компанија туку треба да се земат предвид многу повеќе фактори. Сепак, зголемувањето на дивидендата во континуитет дефинитивно треба да се земе како позитивен сигнал, кој на потенцијалните инвеститори им покажува дека компанијата оди во добра насока.