Полугодие за заборав на Македонска берза: Прометот се преполови

Меланхолично расположение на македонскиот пазар на капитал во првата половина од годината. Прометот и бројот на трансакции бележат пад од над 40 отсто, намалена е и вредноста на берзанскиот индекс МБИ 10 и пазарната капитализација на компаниите. Ги анализиравме перформансите на пазарот на капитал во земјава во првото полугодие годинава.

Вкупниот промет на Македонската берза во првото полугодие изнесува нешто над 43 милиони евра. Близу 23,5 милиони од нив се истргувани на официјалниот пазар, во 5.879 од вкупно 5.998 трансакции. На редовниот пазар имало 83 трансакции, а 36 се блок трансакции.

Кај класичното тргување во периодот од јануари до јуни годинава споредено со истиот период лани, прометот е помал за 52,08 отсто. Тргувањето со акции е помало за 51,02 отсто, со обврзници за 65,9 отсто. Просечниот дневен промет се намалил за 52,68 отсто, а просечниот дневен број на трансакции за 42,35 отсто.

Блок трансакциите во првите шест месеци од оваа година се намалени за 19,34 отсто во споредба со првото полугодие од 2022 година.

Јавни берзански аукции за големи пакети – немало. Немало и јавни понуди за хартии од вредност.

По месеци, најмногу се тргувало во април, а најмалку во јануари.

Меѓу десетте најтргувани акции – пет се од банки. Комерцијална банка е на врвот со над 2.200 трансакции. Следи фармацевтскиот гигант „Алкалоид“ со 985 трансакции.

Во првата половина од година споредено со крајот на 2022 година најголем раст на цената бележат акциите на УНИ Банка, „Тетекс“, „Фустералко Борец“, „Либерти“ и „Аутомакедонија“. Најголем пад на цената има кај „ЖАС“ Скопје, „Единство“ Струмица, „ФЗЦ 11 Октомври“ Куманово, Централна кооперативна банка и „Мода“ Свети Николе.