Голем пад на прометот и на бројот на трансакции има на Македонската берза во јануари годинава споредено со истиот месец во минатата годинa. Нашата анализа покажа дека, всушност, берзата ја почна 2023 година со најслаби резултати во изминативе пет години.
Вкупниот промет на Македонската берза во јануари годинава изнесувал 3,1 милиони евра, што е неколкукратно намалување во однос на истиот месец минатата година, кога вкупниот промет на берзата изнесувал 14,6 милиони евра.
Незавидни се резултатите и во однос на бројот на трансакции и просечниот дневен промет. Имено, на берзата во јануари годинава имало 897 трансакции, што е рекорден пад во однос на претходните години, а просечниот дневен промет изнесувал 168.357 евра, што исто така е рекордно намалување.
На крајот на првиот месец од годинава вредноста на берзанскиот индекс МБИ10 забележа благ раст во однос на последниот ден од декември минатата година. Но во јануари минатата година индексот изнесувал 6.226,37, а во јануари годинава паднал на 5.842,80.
Во однос на вредноста на акциите што го формираат МБИ10 и се јавуваат меѓу најтргуваните хартии од вредност се забележителни различни перформанси. Така, просечната вредност на акцијата на Комерцијална банка во јануари годинава изнесувала 12.326 денари, што е благо зголемување во однос на истиот месец минатата година, кога просечната вредност била 12.232 денари. Во истиот период, просечната вредност на акцијата на „Алкалоид“ бележи пад од 18.605 денари на 17.733 денари. Намалување има и кај акцијата на „Макпетрол“ и НЛБ банка, и тоа од 78.551 на 68.244 денари и од 29.220 на 24.473 денари, соодветно. Благо намалување на просечната вредност бележат и акциите на Стопанска банка - Скопје, „Македонијатурист“ и на „Гранит“.
Освен влошениот економски амбиент предизвикан од енергетската криза и стравувањата од рецесија, веројатно една од главните причини за намалувањето на обемот на тргување на берзата и воздржаноста на инвеститорите е што од почетокот на годинава стапи во сила оданочувањето на капиталните добивки од тргување со акции. Иван Штериев, главен извршен директор на Македонската берза, уште во септември минатата година предупреди дека воведувањето на овој данок ќе има негативно влијание врз активностите на пазарот на капитал, кој и лани бележеше надолни параметри.
„Тајмингот реално не е поволен. Состојбите на пазарот се влошени, а вкупниот промет на берзата годинава е намален за околу 40 проценти. Физичките лица што би биле цел на новиот данок креираат повеќе од 60 отсто од годинашниот промет на берзата и овој данок ќе значи удар за кревкиот и плиток пазар. Законските решенија треба да се подобрат“, изјави тогаш Штериев.
.webp){kind=icon}
