Кои акции би можеле да растат по намалувањето на референтните каматни стапки?

Извесно е дека во текот на септември годинава ќе има олабавување на монетарната политика во САД и во Европа односно дека Европската централна банка (ЕЦБ) и Федералните резерви на САД (Фед) ќе ги намалат референтните каматни стапки, што би требало да поттикне намалување на трошоците за задолжување односно пад на каматите на комерцијалните кредити. Со оглед на тоа што трошоците за задолжување играат битна улога во работењето на компаниите, нивните инвестиции и профитните маржи, анализиравме како очекуваното намалување на каматите би можело да влијае на пазарот на капитал односно кои акции би можеле да остварат раст во, условно кажано, новото монетарно опкружување.  

Најзадолжените ќе имаат најголема корист

Михаел Блажековиќ, аналитичар на пазари во „Блумберг Адрија“, вели дека е речиси сигурно дека ЕЦБ ќе продолжи со намалување на референтните каматни стапки и дека Фед ќе почне со очекуваното намалување на каматните стапки во следната сесија.

„Инвеститорите на пазарот на капитал во голема мера веќе ги вкалкулираа овие движења, така што не очекуваме значителна нестабилност по одлуките на централните банки. Со оглед на очекувањата за натамошно олеснување на монетарната политика во наредните месеци, цените на обврзниците растат, додека цените на акциите остануваат под влијание на вестите поврзани со американскиот пазар на трудот и тековниот раст во технолошкиот сектор“, вели Блажековиќ.

Михаел Блажековиќ, аналитичар на пазари во „Блумберг Адрија“

Според него, преносот на пониските референтни каматни стапки на стапките на корпоративните заеми најверојатно ќе биде побавен, но се очекува дека следната година може да донесе пониски каматни стапки, што ќе доведе до поповолни услови за задолжување или можности за рефинансирање на постојните обврски.

„Најзадолжените компании имаат најголема корист од пониските стапки, бидејќи тоа би можело да ги намали трошоците и да ослободи капитал за потенцијални капитални трошоци“, вели Блажековиќ.

 

 

Тој додава дека во моментов најзадолжен сектор во САД, мерено според нето долгот кон ЕБИТДА, е индустријата, со задолженост од 6,7 пати, по што следува комуналниот сектор (5,6 пати).

„Иако потрошувачкиот дискрециски сектор е помалку задолжен со нето-долг во однос на ЕБИТДА од 2,4 пати, тој се соочува со највисоки трошоци за заштита (CDS), бидејќи е најцикличен и зависен од економските трендови“, вели Блажековиќ.

Тој укажува дека кога станува збор за европскиот индекс STOXX600, секторот на недвижности останува најзадолжен, со оглед на тоа што се мачеше во Западна Европа во последните година-две.

„Комуналните претпријатија се на второто место, а со потенцијално пониски каматни стапки во блиска иднина, тие би можеле да забележат намалени финансиски трошоци, а со тоа да ги подобрат нивните нето-маржи“, вели Блажековиќ.

 

 

Кои компании се чувствителни на каматите?

Васко Богдановски, инвестициски портфолио-менаџер, кој е соосновач и извршен партнер во „Опфолио“ (Opfolio), вели дека компаниите чии производи се продаваат преку кредитирање или лизинг се особено чувствителни на промените во каматните стапки.

„Кај некои од нив високите каматни стапки доведоа до намалена продажба“, вели Богдановски.

Тој го наведува примерот на „Инмод“ (InMode), компанија што своите апарати, кои се наменети за ординации и козметички салони и чинат повеќе од 100.000 долари, обично ги нуди преку лизинг.

„Во последниов период, поради високите камати, клиентите одложуваат инвестиции во нова опрема. Со најавеното намалување на каматните стапки од страна на централните банки, се очекува дополнително намалување на каматите од страна на лизинг-компаниите, што би го олеснило купувањето на новата опрема и би довело до зголемување на приходите и профитите на компаниите како ‚Инмод’‘‘, вели Богдановски.

Васко Богдановски, инвестициски портфолио-менаџер, соосновач и извршен партнер во „Опфолио“

Според него, за да продолжи продажбата, некои од овие компании се решаваат на пониски профитни маргини.

„Таков е примерот со ‚Тесла‘ (Tesla). Најавеното намалување на каматните стапки е добредојдено кај компаниите од автомобилската индустрија, бидејќи конечно ќе можат да ги вратат своите профитни маргини, а со тоа и добивките“, вели Богдановски.

Тој додава дека затегнатата монетарна политика влијаеше и врз инвестициските фондови за недвижности (REIT), како „ВИЦИ пропертис“ (VICI Properties Inc).

„И покрај тоа што овие компании се познати по високите дивиденди, во периодот на високи каматни стапки интересот за нивните акции опадна. Тоа се случи поради тоа што се зголемија и каматите на државните обврзници, кои, како помалку ризична инвестиција, станаа поатрактивни. Со други зборови, акциите на овие компании се соочија со сериозна конкуренција од државните обврзници. Со намалувањето на каматните стапки, акциите на REIT повторно ќе станат атрактивни и нивната цена ќе порасне“, смета Богдановски.

Во моментов нема коментари за веста. Биди прв да коментира...

Остави коментар