Преглед на берзите: „Тесла“ најголемо изненадување, се чекаат изборите во САД

„Тесла“ беше најпријатното изненадување на светскиот пазар на капитал во измината недела откако акциите на компанијата остварија раст од 22 проценти во четвртокот во Њујорк, што е најголема добивка од мај 2013 година. Растот на вредноста на акциите дојде откако производителот на автомобили објави изненадувачки силна заработка и прогноза за раст на продажбата на возила од дури 30 проценти во следната година.

Добрите резултати од третиот квартал беа поттикнати од пресвртот што го донесе „Сајбертрак“ (Cybertruck), кој генерира профит за првпат откако беше пуштен во производство. Пониските трошоци за материјали, проширувањето на енергетскиот бизнис и продажбата на кредити на производителите на автомобили на кои им е потребна помош за усогласување со ограничувањата за емисиите, исто така, придонесоа за најдобрата квартална заработка на „Тесла“ во повеќе од една година.

Ваквиот раст на акциите на „Тесла“ предизвика верижна реакција односно дневен раст на американскиот индекс S&P 500 во четвртокот од 0,2 проценти, што е разбирливо со оглед на тоа што големите технолошки компании познати како седум величествени (Magnificent Seven) имаат значително влијание врз неговата вредност. Сепак, S&P 500 во петокот беше на пат да оствари неделна загуба до еден процент.

Реперот за американските акции бележи раст од почетокот на годината од 21,8 проценти, а мислењата на аналитичарите се поделени околу прогнозите до крајот на годината. Следната недела се очекуваат новите економски податоци, вклучувајќи го и месечниот извештај за платите во САД, кој треба да даде индиции за идниот опсег на олеснување на политиката од страна на Фед. Воздржаност меѓу инвеститорите носи и наближувањето на 5 ноември, за кога се закажани претседателските избори во САД, при што некои аналитичари предупредуваат дека трговските тарифи и даночните намалувања што ги фаворизира Доналд Трамп, во случај на негова победа, би можеле повторно да ја разгорат инфлацијата.

Bloomberg Mercury

Кога станува збор за влијанието на изборите врз пазарите на капитал, интересно е да се напомене дека американските акции се во своевидна оаза на смиреност во споредба со оние во азиско-пацифичкиот регион. Имено, според податоците на „Блумберг“,  60-дневната нестабилност на индексот S&P 500 е за шест поени пониска од онаа на азиско-пацифичкиот индекс MSCI, што е најголем јаз од 2017 година. Аналитичарите толкуваат дека нестабилноста на азиските акции е главно предизвикана од еуфоријата од новите стимулации на Кина, за кои сѐ уште нема показатели како ќе влијаат врз тамошната економија, како и од предизборниот период во Јапонија, за општите избори што се одржаа викендов.

Bloomberg Mercury

На европско тло, индексот Stoxx Europe 600 падна за 0,1 процент во петокот наутро, а акциите на компаниите од автомобилската индустрија, комуналните услуги и градежништвото беа меѓу секторите со најлоши перформанси. Европските акции што се дел од индексот бележат неделен и месечен пад, но сепак имаат раст од 6,9 проценти од почетокот на годината заклучно со четвртокот.

Некои од аналитичарите сметаат дека акциите во Европа малку се намалија месецов бидејќи тргувањето и понатаму е претпазливо во однос на претстојните ризици, вклучувајќи ги неизвесноста околу буџетот на Велика Британија и исходот од изборите во САД. Дополнителен притисок има врз секторите што се најмногу изложени на Кина, како што се индустријата на луксузот и рударството, чии резултати многу зависат од тоа дали ќе живне кинеската економија и од тоа како ќе се одвива тивката трговска војна со ЕУ.

Релативно стабилно беше и на пазарот на клучните суровини. Златото имаше мал пад од 0,4 проценти во петокот, на 2.726 долари за унца, а нафтата од типот брент се зголеми за 0,1 процент, на 74,47 долари за барел.

Биткоинот во четвртокот напредуваше за околу еден процент, до 67.416 долари, намалувајќи го својот неделен пад на приближно два процента. Најголемото дигитално средство порасна за околу 60 проценти годинава и достигна рекордно високо ниво од 73.798 долари во март, кое беше поттикнато од побарувачката за американски спот-биткоин ЕТФ-ови (фондови со кои се тргува на берза).

Bloomberg Mercury

Се чини дека иднината на биткоинот многу ќе зависи од изборите во САД, особено поради тоа што Доналд Трамп вети дека ќе ги направи САД главен криптоцентар на планетата додека се бори за гласови со демократската кандидатка Камала Харис, која има  поодмерен пристап за криптовалутите односно вети дека ќе поддржи регулаторна рамка за индустријата.

Изминатата недела компаниите што котираат на Македонската берза и на берзите во регионот Адрија почнаа да ги објавуваат финансиските извештаи за периодот јануари-септември годинава, кои ќе бидат добар показател во која насока би требало да се движат крајните годишни резултати. Извештаите што беа објавени минатата недела не донесоа значителни промени во однос на активностите на берзите во регионот.  

Повеќето берзански индекси заклучно со четвртокот забележаа минимален неделен пад, со исклучок на босанските.