Тргувањето со нафта ја започна неделава со загуби поради загриженоста во врска со побарувачката од Кина и најавите за зголемување на понудата од Иран, објавени денеска.
Вест Тексас Интермедиејт (West Texas Intermediate) падна за дури 5,7 проценти на 86,84 долари за барел, што претставува најниско ниво во последните шест месеци. Нафтата се повлече откако Кина најави изненадно намалување на каматните стапки поради слабите економски податоци, додека сè повеќе наближува најавениот нуклеарен договор со Иран, кој што би можел да ги зголеми изгледите за количината за снабдување со нафта.
Некои од потенцијалните дополнителни испораки на иранската нафта на светскиот пазар веќе добија проценка на вредноста. Аналитичарите сметаат дека секоја вест за дополнителна испорака ќе претставува муниција за фондовите кои продаваат нафта во борбата против забавувањето на економијата.
После повеќе од една година застој и откажани преговори, нуклеарниот договор со Иран изгледа сè поверојатно споредено со претходните месеци. Портпаролот на иранското министерство за надворешни работи изјави дека „во блиска иднина“ би можело да постои основа за потпишување на договорот. Министерот за надворешни работи, пак, Хусеин Амирабдулахан, рече дека Иран вечерва ќе ја извести Европската Унија за својот став во врска со конечниот нацрт текст за финализирање на нуклеарниот договор.
Во меѓувреме, податоците објавени денеска покажуваат дека побарувачката за нафта во Кина во текот на минатиот месец била за околу 10 отсто помала во однос на истиот месец лани поради економијата погодена од блокадите заради вирусот и проблемите со недвижностите.
Аналитичарите гледаат дека кинеската економија не е баш толку розова како што се надеваа луѓето, а потрошувачката е пониска од очекувањата, особено за нафтата.
Заздравувањето на кинеската економија неочекувано ослабна во јули бидејќи новата епидемија на Ковид-19 влијаеше на потрошувачката и кај домаќинствата и кај бизнис секторот. Индустриското производство порасна за 3,8 проценти во однос на минатата година, што е пониско од јунските 3,9 проценти и далеку под предвидувањата на економистите за раст од 4,3 проценти.
Инаку, сировата нафта падна во текот на изминатите неколку месеци поради загриженоста за забавувањето на економскиот раст, со што се стопија сите добивки остварени по руската инвазија врз Украина.
.webp){kind=icon}
Во моментов нема коментари за веста. Биди прв да коментира...