Победа на европските акции, обврзници и еврото: Трамп несакајќи ја врати Европа на мапата

Долго слабите финансиски пазари во Европа се враќаат во животот бидејќи напорот на Доналд Трамп за преобликување на глобалната трговија и безбедност ја поткопува повеќедецениската доминација на Америка. Низ сите можни средства, Стариот континент колективно ја соборува Америка на начин каков што ретко бил виден досега. Еврото е најсилно во последните три години. Германските обврзници минатата недела извојуваа најголема победа над американските државни записи. Иако европските акции беа нокаутирани од трговската војна, тие се покажаа многу поотпорни од американските. 

Поместувањето од пред само шест месеци е извонредно. Европските пазари кон крајот на 2024 година се чинеше дека беа предодредени засекогаш да бидат во сенката на САД и исклучителноста поттикната од Трамп. Сè за што некој сакаше да зборува беа жешките акции поврзани со вештачка интелигенција во САД, растечкиот долар и претстојниот бран на даночни намалувања и дерегулација што ќе ја направи Америка повторно голема.

„Постои чувство дека Европа е само музеј. Па, музејот сега оживува“, рече Кетрин Браганза, која купуваше европски обврзници со висок принос за средствата со кои управува во „Инсајт Инвестмент“ во Лондон.

Потресот дојде од неколку правци одеднаш. Политките за воведување, па одлагање на тарифите на американскиот претседател и планираната фискална политика ги принудија инвеститорите да се запрашаат дали државните трезори и доларот сè уште ќе бидат рајот каков што беа со децении. Германија вети стотици милијарди евра трошоци за одбраната и инфраструктурата, откако Трамп јасно стави до знаење дека САД повеќе нема да служат како главен гарант за европската безбедност.

Сето тоа сугерира дека доаѓа крајот на ерата во која Америка, во срцето на глобалните финансиски пазари и трговија, цицаше трилиони долари од остатокот од светот. Сега инвеститорите бараат алтернативни места за да пласираат своите пари директно отфрлајќи ги политиките на Трамп и непредвидливиот стил на владеење.

Некои од најголемите имиња во финансиите се позиционираат за повеќе придобивки во Европа. „Вангард Интернешнл“ (Vanguard International) ги фаворизира обврзниците со краток датум во еврозоната каде централна банка има слобода да ги намали каматните стапки. „Голдман Сакс Груп“ очекува еврото расте до 1,20 долари бидејќи привлечноста на доларот опаѓа. Беата Ментеј од „Ситигруп“ (Citigroup Inc.), која во октомври го предвиде растот на акциите во Европа, оваа недела ги намали рејтинзите на американските акции на неутрални, додека ја задржа својата позитивна перспектива за Европа.

Секако, изгледите за самата Европа станаа покомплицирани. Царините на Трамп го намалија оптимизмот по одлуката на Германија минатиот месец да започне со трошење, што е витално за траен раст во целиот блок. А потенцијалната американска рецесија би ги повлекла и другите економии - вклучувајќи ја и Европската унија, попречувајќи ја валутата и поризичните средства.

Но, европските пазари сè уште имаат многу во нивна корист, знак дека долгорочната ротација на готовина во регионот можеби само што започна. За политичарите и централните банкари на континентот, распаѓањето на американските трговски политики е одлична можност за еврото да напредува како резервна валута, јадејќи ја долгогодишната хегемонија на доларот.

Доларот - вообичаено средство за прибежиште во периодите на пазарни превирања - падна на ново шестмесечен минимум во понеделникот, бидејќи најновата тарифна политика на администрацијата на Трамп го зголеми немирот на инвеститорите кон американските средства.

Германските обврзници се покажаа како безбедно место среде метежот. Бидејќи американскиот 10-годишен принос порасна за половина процентен поен за само пет дена, еквивалентниот принос од Германија се спротивстави на повисок раст. Додека државните трезори се стабилизираа оваа недела, промените на цените беа доволно сериозни за да ги остават пазарните учесници да внимаваат на интервенцијата на Федералните резерви.

Како што потенцијалниот скок на инфлацијата се заканува да ја ограничи способноста на Фед да ги намали каматните стапки, Европската централна банка има појасна патека да го стори тоа. Пазарите на пари се уверени дека во четврток доаѓа намалување за четвртина поен, со уште најмалку два потези до крајот на годината.

„Денес претпочитаме да инвестираме во германските обврзници “, рече Николас Џулиен, глобален шеф за фиксен приход во „Кандриам“, коментирајќи ги омилените средства за засолнување на фирмата. Додека Германија е подготвена да ја зголеми продажбата на обврзници, „нивото на долг е многу ниско и мислам дека треба да ги надмине во безризичност американските записи“.

Исто така, постои растечки впечаток, заснован на кохезивниот одговор на ЕУ на пандемијата во 2020 година, дека блокот е посилен отколку што беше некогаш, што помогна да се ограничи изливот на приносите на земјите оптоварени со долгови како Италија во неодамнешната нестабилност.ЕУ е „поотпорна отколку во минатото и тоа исто така треба да биде добро за инвестициските текови, барем во релативна смисла“, рече Василиос Гкионакис, виш економист и стратег во „Авива Инвесторс“ (Aviva Investors).

Европските акции исто така ги привлекуваат инвеститорите кои бегаат од нестабилноста што ги зафати американските пазари. Глобалната анкета за менаџери на фондови на „Бенк оф Америка“ (Bank of America Corp.) оваа недела покажа рекорден број на испитаници кои имаат намера да ја намалат изложеноста на американските акции.

S&P 500 падна за 7,9 проценти оваа година, вклучувајќи ги дивидендите наспроти повратот од 10 проценти во долари за индексот Stoxx Europe 600. Сепак, судејќи според соодносот цена-заработка, европските акции сè уште изгледаат како добра зделка: тие се речиси 30 проценти поевтини од САД, многу повеќе од просечната разлика од 17 проценти од пред неколку децении.

„Амунди“ (Amundi SA), најголемиот менаџер на средства во Европа, е меѓу оние кои ги фаворизираат европските акции со предност за дефанзивни, квалитетни и вредносни акции. Главниот директор за инвестиции, Винсент Мортие, вели дека континентот е добро поставен да ги зафати приливите.

„Вакви моменти се случуваат само еднаш на 100 или 200 години“, рече тој во едно интервју. „Европа се врати на мапата“.

- Со помош на Мајкл Мсика и Нил Каланан