Приносот на десетгодишните обврзници во САД надмина четири отсто

Приносот на десетгодишните државни обврзници во САД надмина четири отсто за прв пат во последните 10 години поради загриженоста на инвеститорите за заострувањето на монетарната политика од страна на Федералните резерви и распродажбата на американските обврзници во Јапонија.

Индексот што ги следи американските хартии од вредност продолжи да паѓа во својата најлоша година од 70-тите, откако претседателот на ФЕД во Сент Луис, Џејмс Булард, предупреди дека централната банка ќе треба да продолжи да ги зголемува каматните стапки за да го зачува својот кредибилитет. Американските обврзници се исто така на удар поради шпекулациите дека слабеењето на јенот може да ја принуди Јапонија да интервенира дополнително, веројатно преку продажба на обврзници.

Приносот на десетгодишната државна обврзница во САД се зголеми за шест базични поени на четири отсто во средата, што е првпат да го надмине тој праг од април 2010 година. Од почетокот на 2022 година, приносот се зголеми за речиси 250 базични поени. Обврзниците се на пат кон нивната најголема годишна загуба од 1973 година, при што индексот на Bloomberg покажува пад за 14 отсто оваа година.

„Податоците од САД беа пристојни преку ноќ, а посилниот долар во однос на јенот влијаеше на обврзниците“, рече Ендрју Тајсхерст од Nomura Inc. „Како што се приближуваме до ниво од 145, шансите за нови интервенции ќе се зголемуваат, а има аналитичари кои веруваат дека Јапонија би можела да интервенира преку продажба на обврзници“, додаде Тајсхерст.

Можно е Јапонија да купила рекордни 24,9 милијарди долари минатиот четврток за да ја зајакне својата валута, проценуваат од компанијата Totan Research Co. Тоа претставува околу 20 отсто од готовинскиот дел од државните девизни резерви на владата од 1,1 илјада милијарди долари, што укажува на можноста дека понатамошни интервенции би можеле да вклучат и продажба на обврзници, рече Тајсхерст.

Намалената ликвидност поради намалувањето на портфолијата на централните банки, како и зголемената нестабилност, ја влошуваат веќе постоечката финансиска несигурност. ФЕД го забрза темпото на продажба на обврзници овој месец, познато и како квантитативно затегнување (анг. quantitative tightening), а Банката на Англија (BOE) ќе го стори истото следната недела.

„Ликвидноста пресуши, а продажбата на обврзници може да се забрза, особено затоа што има многу инвеститори кои се подготвени да ги намалат загубите“, вели Еичиро Тани, главен стратег во Daiwa Securities Co. „Квантитативното затегнување од страна на централните банки има значително влијание врз ликвидноста на пазарот“, додава тој.

Пораката на Булард во вторникот беше повторена од претседателот на ФЕД на Чикаго, Чарлс Еванс и неговиот колега од Минеаполис, Нил Кашкари, кои рекоа дека централната банка треба да ги зголеми каматните стапки за онолку колку што претходно најави. Каматите треба да останат на тоа ниво додека цените не почнат да паѓаат, додаваат тие.

Пазарите на обврзници исто така беа потресени од најавата за намалување на даноците во Обединетото Кралство што ги поттикна стравувањата од фискално расипништво на глобално ниво, што на крајот доведува до уште повисоки каматни стапки.