Владината реконструкција го одложи задолжувањето преку еврообврзницата

Владината реконструкција ја одложи постапката за задолжување на земјава на меѓународниот пазар преку еврообврзница. Од Министерството за финансии (МФ) информираат дека процесот за издавање на еврообврзницата ќе се изврши по изборот на нов министер за правда.

„Целосната постапка за издавање на еврообврзницата ќе биде извршена по спроведувањето на административните процедури, кои подразбираат и мислење од новиот министер за правда. Веднаш по изборот на новиот министер за правда ќе се одржи нова аукција“, информираат од МФ преку соопштение испратено попладнево до медиумите.

За прекинот на процесот и за одржувањето на новата аукција банките-агенти, кои посредуваа при издавањето на еврообврзницата, ќе ги информираат инвеститорите.

Во согласност со процедурата за избор на нови министри, Собранието на 13 февруари 2023 година прими оставки од четворица досегашни министри, меѓу кои и министерот за правда, а кои се прифатени од Собранието.

„Законски, за издавање на еврообврзницата, потребно е мислење од министерот за правда, кој е меѓу министрите што поднесоа оставки до Собранието“, велат од МФ.

Инаку, според првичниот план на Министерството за финансии, максималниот износ за задолжување преку оваа еврообврзницата беше 800 милиони евра. Сепак, и покрај големиот интерес, со понудени околу 1,5 милијарда евра од страна на инвеститорите, на крајот износот на задолжување требаше да биде 600 милиони евра, со каматна стапка од 6,5 проценти.

Македонија со парите од обврзницата треба да отплати 450 милиони евра обврзници што достасуваат во јули и да финансира буџетска дупка од 4,6 отсто од БДП оваа година.

Како водечки менаџери за продажбата на новата еврообврзница беа ангажирани Ситигруп (Citigroup Inc.), Дојче банк (Deutsche Bank AG), Ерсте груп (Erste Group Bank AG) и ЏП Морган Чејс (JPMorgan Chase & Co).