Провизиите ќе си ги платиме, а следната еврообврзница ќе биде поскапа

Несериозен и скап. Вака поранешни министри за финансии и експерти за „Блумберг Адрија“ го коментираат потегот на власта да се откаже од еврообврзницата од минатата недела, вредна 600 милиони евра.

Причината за откажувањето изгледа многу технички. За да се заврши трансакцијата, требало да потпише министерот за правда, но тој поднесе оставка без да потпише. Министерството за финансии соопшти дека ќе има нова аукција, кога ќе има нова влада.

Според нашите соговорници, овде има два проблема, прво економски, а потоа и политички. Економски затоа што и вака скапото задолжување ќе стане уште поскапо, политички - затоа што е несериозно и личи на лошо управување.

Кога ќе има нова аукција, Министерството за правда не прецизира, само соопшти дека тоа ќе биде по изборот на новата влада, а за експертите е неизвесно колку ќе биде стабилна таа нова влада за да може да го истурка целиот процес на задолжување на странските пазари.

Политичка нестабилност – нема координација во првиот ешалон на власта

Поранешниот министер за финансии и универзитетски професор Трајко Славески во изјава за „Блумберг Адрија“ вели дека ова е нешто што многу ретко се случува на финансиските пазари и е сигнал за лошо раководење.

Трајко Славески, поранешен министер за финансии и универзитетски професор / Блумберг Адрија

„Ова покажува колкава е всушност, неусогласеноста во највисоките ешалони на власта. Друг проблем се значителните износи што по основа на провизии земјава веќе им ги плати на четири банки-агенти и кои се неповратни“.

Благица Петрески, извршна директорка на институтот за економски истражувања и политики, „Фајнанс тинк“, вели дека испраќаме лоша порака.

„Вториот аспект е пораката што ја креираме со ваквите пропусти, на несериозност и приоритизација на политичките прашања наместо политиките“, објаснува Петрески.

За Џевдет Хајредини, исто така поранешен министер за финансии, ова само ќе ја искомплицира и така тешката позиција во која се наоѓа Владата, а со тоа и земјата.

„Власта упорно се обидува да прикаже пред јавноста дека во земјава се водат успешни економски политики, министерот пишува убави колумни, но реалноста е дека сме во многу незгодна ситуација. Не се знае кога ќе има нова влада или колку новото мнозинство ќе биде стабилно. Сега е сосема очигледно дека во државата нешто не е во ред“, вели Хајредини.

Високата камата ќе стане уште повисока

Петрески вели дека пропаднатата аукција не значи дека земјава нема да може да се задолжи, туку по која цена ќе биде тоа.

Благица Петрески, извршна директорка на „Фајнанс тинк“

„Незавршувањето на постапката за издавање на еврообврзницата и потребата за нова аукција не претставуваат ризик дали средствата ќе бидат обезбедени, но претставуваат ризик за условите под кои истата таа ќе биде издадена. Условите на финансиските пазари се затегнати и во скоро време нема да станат подобри, а и дополнително, според сигналите што ги дава Европската централна банка, референтната каматна стапка ќе продолжи благо да се зголемува до  јуни. Тоа упатува дека можеби реиздадената еврообврзница ќе биде по повисока каматна стапка“, вели таа.

Професорот Славески вели дека ова е репутациски ризик за земјава, од аспект на тоа дали инвеститорите што учествуваа на аукцијата минатата недела ќе сакаат пак да се пријават. Сето ова носи неизвесност за следната аукција.

„Кои услови ќе ги имаме при следниот настап на финансиските пазари? Многу е извесно дека инвеститорите следниот пат ќе бараат повисоки приноси“, вели тој.

И за Хајредини вчерашниот потег на власта значи дека во идниот период, на идната аукција, земјава скапо ќе ја плати оваа несериозност.

Џевдет Хајредини, поранешен министер за финансии / Приватна архива

„Каматата што беше постигната минатата недела беше висока, а сега е исклучена можноста да се преговара за подобри услови. Ќе се задолжиме поскапо. Ова е многу лоша ситуација“, смета тој.

Нов министер, па нова аукција

Министерството за финансии вчера доцна попладне соопшти дека целосната постапка за издавање на еврообврзницата ќе биде извршена по спроведувањето на административните процедури, кои подразбираат и мислење од новиот министер за правда.

„Веднаш по изборот на новиот министер за правда ќе се одржи нова аукција. За ова банките-агенти што посредуваа при издавањето на еврообврзницата ќе ги информираат инвеститорите, кои при минатата аукција имаа 2,5 пати поголем интерес во однос на понудената сума, како резултат на довербата во добрите економски политики“.  

Сега веќе бивш, министерот за правда Никола Тупанчевски даде оставка на 13 февруари. Пред тоа имаше неколку дена да го стави потребниот потпис за четиригодишното задолжување со камата од 6,5 отсто, највисоко во последните десетина години.

„Каматата е очекувана, но краткиот рок на достасување на новата еврообврзница значи дека инвеститорите не се подготвени да ѝ позајмуваат пари на Македонија по вакви камати“, изјави по аукцијата главниот аналитичар на „Блумберг Адрија“, Андреј Кнез.

За македонската обврзница минатата  среда, „Блумберг“ извести дека имало интерес затоа што земјата е конзервативно управувана и не излегува често на странските пазари.

Со парите што требаше да се позајмат државата ќе враќаше стари долгови.

Во моментов нема коментари за веста. Биди прв да коментира...

Остави коментар