.webp){kind=icon}
Реномирани меѓународни инвестициски фондови, банки и инвестициско-советодавни куќи што управуваат со портфолија тешки илјадници милијарди долари заработуваат од каматите и од тргувањето со македонските еврообврзници односно од финансирањето на јавниот долг на Македонија. Според податоците од терминалот „Блумберг“, меѓу најголемите инвеститори во нашите еврообврзници се компании од САД, Германија, Луксембург, Велика Британија и од повеќе европски земји.
Станува збор за македонските еврообврзници издадени во јануари 2018 година, јуни 2020 година, март 2021 година и во март 2023 година, во номинален износ од 500 милиони евра, 700 милиони евра, 700 милиони евра и 500 милиони евра, соодветно, со рок на достасување од 7, 6, 7 и 4 години и годишни каматни стапки од 2,75 проценти, 3,675 проценти, 1,625 проценти и 6,96 проценти, соодветно. Овие хартии од вредност зафаќаат знaчителен дел од јавниот долг на нашата земја, кој во првиот квартал достигна 8,7 милијарди евра.
Според податоците на „Блумберг“, најголем инвеститор во македонските еврообврзници издадени во 2018 година, со вкупна сума од 500 милиони евра, камата од 2,75 проценти и рок на достасување во 2025 година, е „Унион инвестмент Луксембург“ (Union Investment Luxembourg SA) со седиште во Германија, во чија сопственост се 2,46 проценти од вкупниот број обврзници. Станува збор за компанија што, според податоците објавени на нејзиниот сајт заклучно со 31 декември 2023 година, управува со 142 фона со вкупни средства од 80,6 милијарди евра. Компанијата во своето работење користи внатрешни и надворешни инвестициски менаџери и советници од шест различни земји.
Прочитај повеќе
Распонот на македонските еврообврзници сигнализира зголемени ризици
На почетокот на вториот квартал од годинава, а особено од април наваму, повторно има проширување на распоните кај сите македонски еврообврзници.
27.06.2024
Прва задача брз ребаланс: А колкави нови долгови се потребни?
До крајот на годината за претходно запишани ДХВ, Министерството треба да исплати над 480 милиони евра
25.06.2024
Анализа: Изборите носат ризик за јавниот долг на Македонија
Моменталната задолженост не е алармантна, но треба да се внимава и да се запази границата на задолжување од 60 проценти од БДП.
11.04.2024
Во македонските еврообврзници издадени во 2020 година, во вкупна сума од 700 милиони евра, камата од 3,67 проценти и рок на достасување во 2026 година, најголем инвеститор е американската инвестициско-советодавна куќа „Берингс“ (Barings LLC) со седиште во Бостон, САД, која држи 5,28 проценти од вкупниот број обврзници. Станува збор за глобална фирма за управување со средства тешки над 406 милијарди долари, која има над 1.200 клиенти и повеќе од 1.800 вработени во различни делови од светот.
Американската компанија „Бостон менаџмент енд рисрч“ (Boston Management & Research) се јавува како најголем инвеститор во македонските еврообврзници издадени во 2021 година, во вкупна сума од 700 милиони евра, камата од 1,62 проценти и рок на достасување во 2028 година. Оваа компанија „држи“ 4,97 проценти од вкупниот број обврзници.
Истата компанија е најголем инвеститор и во македонските еврообврзници издадени во 2023 година, во вкупна сума од 500 милиони евра, камата од 6,96 проценти и рок на достасување во 2027 година.
Интересно е дека на второто место на листата најголеми инвеститори во најновите македонски еврообврзници е „Блекрок“ (BlacRock Inc), која важи за компанија што е најголем играч во светот на инвестицискиот менаџмент и управува со средства вредни над 10 трилиони долари.
