Јапонија станува центар на грижи за глобалните инвеститори

За помалку од една недела Јапонија целосно ги промени очекувањата на светот за нејзините пазари и економија.

Земјата беше миленик на финансискиот свет повеќе од една година. Нејзината слаба валута ја насочи берзата кон рекордни височини и повторно ја разгоре инфлацијата по децении. Потоа, Банката на Јапонија (БoJ) ги зголеми стапките минатата среда и гувернерот Казуо Уеда посочи дека има намера да продолжи во тој правец, што придонесе за нагло зголемување на јенот и диво возење на глобалните пазари. Трговците и инвеститорите беа принудени да ги напуштат стратегиите засновани на макроставовите дека јапонската валута ќе остане слаба и дека каматните стапки нема да се зголемат премногу брзо.

„Без сомнение, ова е апсолутно нова почва за пазарите. Сега се бара насекаде во ситуација кога централната банка на Јапонија изгледа одлучна да се извлече од долгогодишната политика на нула или негативни стапки“, рече Стивен Милер, консултант во „Грант Самуел“ (Grant Samuel Funds Management) и поранешен менаџер на фонд во „Блекрок“ (BlackRock Inc). „Јапонија сега е во центарот на грижите - во сè, акции, обврзници, јени, кредити, сè“.

Низ јапонските пазари владееше нестабилност, при што Nikkei 225 во понеделникот го претрпе најголемиот пад од 1987 година, за да се врати за 10 отсто следниот ден. Ударот носи импликации за политиката и домаќинствата во земјата бидејќи превирањата на пазарот може да влијаат на довербата на потрошувачите и деликатното искачување на Јапонија од дефлацијата. Како плус на главоболките на инвеститорите, јенот ослабе за повеќе од 2 отсто во средата, откако заменик-гувернерот на централната банка Шиничи Учида,рече дека банката нема да ги зголемува стапките сè додека пазарите се нестабилни.

Соодносот долар-јен падна од годинашниот нагорен тренд Bloomberg

„Ризикот е дека потрошувачката и инвестициите ќе се задржат поради зголемената несигурност на пазарите“, рече Хирофуми Сузуки, главен девизен стратег во „Сумитомо“ (Sumitomo Mitsui Banking Corp). „Ако се одолжува, може да влијае на деловното однесување и на домаќинствата исто така“.

Според аналитичарите, историска распродажба на пазарот покажува дека секој замав на тргување, со надеж дека ќе се профитира од слабиот јен и широкиот раст на јапонските акции, е избришан. Налетот на јенот исто така исфрли од колосек една од најпрофитабилните пазарни стратегии годинава: carry tradeing, која вклучува позајмување на јапонската валута за инвестирање во други глобални средства. Закрепнувањето на јенот поттикна брзање за да се оствари профит од овие тргувања, што го влоши растот на валутата.

Политичарите и деловните лидери се обидоа да ја смират загриженоста околу последиците од враќањето на нормалните каматни стапки, со коментарите на Учида во средата за задржување на стапките за време на нестабилните пазари, што е чекор назад од минатонеделниот поостар став на Уеда.

Официјалните лица исто така се обидоа да го ублажат влијанието на дивите пазарни промени и врз инвеститорите на мало и врз зголемените инвестициски сметки ослободени од данок. Последното е иницијатива за охрабрување на луѓето да префрлат на пазарот дел од повеќе од 1 квадрилион јени (6,8 трилиони долари) што се наоѓаат на банкарски сметки. Странските инвеститори што останаа најверојатно ќе имаат подолг поглед фокусиран на компаниите што беа посветени на реформи, раст на бизнисот и управување со билансот на состојбата.

„Мислам дека тоа е пазар што сега треба да одговара на фундаменталната анализа - одоздола нагоре наместо одозгора надолу“, рече Пелхам Смитерс, чија фирма со седиште во Лондон нуди истражување за азиските компании со фокус на Јапонија. „Во перспектива, претстои интересно време ако сте избирач на акции“.