ЕУ ги намали ризиците за зимата, цените на гасот паѓаат

Цените на природниот гас во Европа паднаа поради знаците дека ќе може да се преживее оваа зима со оглед на тоа дека  Европската унија вети повеќе чекори за ограничување на кризата, откако првичниот пакет беше договорен минатата недела. Референтните фјучерси паднаа за 5,9 отсто.

Министрите ги поддржаа мерките, вклучително и потребата за намалување на побарувачката на електрична енергија како и одземање на дел од профитот од енергетските компании, и најавија повеќе детали оваа недела кога прашањето за ограничување на големопродажните цени на гасот треба повторно да се стави на маса.

Европската унија беше принудена на акција откако намалувањата во снабдувањето со руски гас ја турнаа економијата во регионот на работ на рецесија и помогнаа за поттикнување на инфлацијата. Тензиите со Москва се зголемија неодамна по експлозиите на гасоводот Северен тек, што европските политичари го нарекуваат саботажа. Додека врските се неактивни, последниот инцидент ја отстранува можноста дека снабдувањето по оваа рута наскоро ќе биде обновено.

„Добрата вест е дека Русија изгледа ја одигра својата последна карта во однос на моќта на гасот над Европа“, се вели во белешката на „Тимера енерџи“. „Сепак, предизвиците на Европа нема да исчезнат со доаѓањето на пролетта“.

Рускиот гас сè уште тече кон Европа преку Украина, но ризикот останува се додека трае војната. Снабдувањето преку гасоводот Турски тек се уште се одвива за некои помали земји-потрошувачи и Турција. Во текот на викендот, Гаспром го прекина снабдувањето кон Италија заради правен спор во Австрија.

Холандскиот гас за испорака во ноември, кој е рефернтна вредност во Европа, падна на 177,70 евра за мегават-час до 8:59 часот во Амстердам.

Останува прашањето за способноста на Европа да ги надополни складиштата следната година во отсуство на вообичаените количини руски гас.

 Залихите се полни околу 88% благодарение на големиот увоз на течен природен гас, но тие ќе се намалат во текот на претстојните постудени месеци. Европската унија повикува на доброволно намалување на потрошувачката од 15 отсто што би помогнало во текот на зимата.

„Граѓаните на Европа најверојатно нема да замрзнат оваа зима поради прекинот на гасот“, велат од Тимера. „Побарувачката е таа што ќе треба да го балансира пазарот за да се избегне целосно намалување на понудата“.