.webp){kind=icon}
Нафтата порасна за повеќе од 5 проценти во својот најголем скок од јули поради потенцијалното намалување на производството од страна на Организацијата на земјите извознички на нафта и нивните сојузнички (ОПЕК+) и стравот од ограничување на понудата.
Bloomberg Mercury
„West Texas Intermediate“ порасна за 4,14 долари, на 83,63 долари за барел по вестите дека ОПЕК+ може да го намалат производството и испораката на нафта за повеќе од милион барели на дневно ниво, што би претставувало најголемо кратење од почетокот на пандемијата. Конечната одлука нема да се донесе додека министрите не се состанат утре во Виена.
„Brent“ договорите за нафта за испорака во декември добија 3,72 долари на вредноста и сега се тргуваат по цена од 88,86 долари за барел.
Прочитај повеќе
ОПЕК+ со план за зголемување на цената на нафтата
ОПЕК+ размислува да ја намали количината на испумпана нафта за да се стабилизира цената на пазарот.
03.10.2022
„За пазарот е изненадување тоа дека ОПЕК зборува за намалување на милион барели на дневно ниво со мали залихи и фактот дека не ги реализираа сопствените производни цели“, рече Роб Хаворт, виш инвестициски стратег во „U.S. Bank Wealth Management“. „Но, и покрај тоа, цените сега паднаа од над 120 долари за барел на 80 долари, па сигурен сум дека на тоа гледаат како на предизвик“, вели Хаворт.
Со потенцијална рецесија и ниска сезонска побарувачка во пресрет на зимата, стратегот Хаворт смета дека нема сјајно сценарио за наредниот период, така што намалувањето на количините има смисла.
Нафтата загуби една четвртина од својата вредност за само три месеци во текот на летото, односно до септември, бидејќи забавувањето на светската економија ја намали побарувачката. Банките, вклучувајќи ги „UBS Group AG“ и „JPMorgan Chase & Co“, рекоа дека ОПЕК+ мора да го намалат производството за најмалку 500.000 барели дневно за да може да дејствуваат на пазарот и да ги стабилизираат цените. „Goldman Sachs“ рече дека намалувањето треба да биде милион барели дневно за да се вратат инвеститорите на пазарот.
Овонеделниот состанок на ОПЕК+ ќе биде прв состанок со физичко присуство на претставниците на членките од март 2020 година и ќе одлучуваат за испораката во декември. Некои членки на ОПЕК+ произведуваат помалку од своите капацитети. Сепак, потенцијалот за натамошно ограничување на испораките покрај веќе ниските залихи би требало да влијае на цената.
Големото намалување на производството може да предизвика критики од страна на Соединетите Американски Држави и другите големи потрошувачи, каде што инфлацијата ги присили централните банки агресивно да ги зголемат каматните стапки.
