Цените на гасот паѓаат бидејќи растат залихите и увозот

Цените на природниот гас во Европа паднаа поради растот на залихите и увозот на течен природен гас, додека европските лидери продолжуваат да бараат начини како да ја ублажат енергетската криза.

Сега во складиштата за гас во Европа исполнети се 90 отсто од капацитетите, што е повеќе од истиот период минатата година, но и натаму е под нивото на залихи од месец октомври во 2019 и во 2020 година, покажуваат податоцитге на „Gas Infrastructure Europe“.

Во меѓувреме, Европската Унија (ЕУ) размислува за привремено ограничување на цените на гасот за да спречи потенцијална рецесија, иако уште не е јасно каков механизам ќе се примени. Индустријата е загрижена дека таквата интервенција може да го попречи снабдувањето во Европа во момент кога треба да се заменат тековите, кои што вообичаено доаѓаат од Русија.

Исполнетост на капацитетите во складиштата за гас / Bloomberg Mercury

Европскиот увоз на течен природен гас може да порасне за 45-50 проценти оваа година, наведува „Bloomberg Intelligence“. Меѓутоа, течниот гас може да замени само околу 30 отсто од испораките на гас од Русија, велат аналитичарите на „Bloomberg Intelligence“, Тејлон Кастер и Патрицио Алварес.

Рускиот извоз на гас во Европа е намален откако на крајот од февруари започна војната во Украина. Додека одредени количини руски гас уште минуваат преку Украина, другите рути се прекинати, вклучувајќи ја и клучната врска со Германија, гасоводот Северен тек.

Ако зимата биде поладна од очекуваното, тоа ќе го забрза повлекувањето на резервите од складиштата и ќе го стави континентот во ранлива позиција. Се очекува дека температурите ширум северозападна Европа ќе паднат во втората половина од октомври.

Утрово, Холандскиот гас со испорака во јануари се тргуваше за 8,4 проценти пониско, по цена од 161 евро за мегават час.