Централните банки купија рекордно количество злато во последниот квартал, бидејќи ги диверзифицираа девизните резерви, a голем дел од количествата набавија сè уште непознати купувачи.
Централните банки собрале речиси 400 тони злато во третиот квартал, што е над четири пати повеќе во споредба со истиот период во 2021 година, покажуваат податоците на Светскиот совет за злато (анг. World Gold Council - WGC). Тие набавки го зголемија вкупниот износ досега годинава на највисоко ниво од 1967 година, кога доларот сè уште беше поддржан од благородниот метал.
Цените на златото годинава беа под притисок поради агресивните зголемувања на каматните стапки во САД, бидејќи Федералните резерви (ФЕД) се справуваат со зголемена инфлација, што ги натера инвеститорите во фондовите со кои се тргува на берзата да го продаваат ова средство што не носи принос. Но поддршката дојде од други области, како што се купувачите на мало во Азија и централните банки.
Централните банки, вклучувајќи ги и оние на Турција и Катар, неодамна купија злато, а меѓу набавките се и непријавени купувања од институции - за што од WGC посочија дека иако не е невообичаено, сепак претставува значајна сума. Не сите земји редовно ги пријавуваат своите купувања на злато, вклучувајќи и некои големи економии, како Кина и Русија.
„Не сите официјални институции јавно ги пријавуваат своите резерви на злато, а тоа може да го сторат и со задоцнување“, се вели во кварталниот извештај на WGC објавен во вторникот. „Не можеме да исклучиме дека и во наредниот период ќе има непријавени набавки“, се додава во него.
Побарувачката за злато од централните банки на највисоко ниво во последните 55 години / Bloomberg Mercury
Советот очекува годинава да опаднат вкупните вложувања во злато, бидејќи пониските берзански фондoви (ETF) и послабата побарувачка надвор од берзата го неутрализираат силното купување на мало.
„И покрај силната побарувачка, цените на златото во голема мера се поттикнати од надворешни фактори, како што се макроекономското расположение и насоката на доларот“, вели Гнанасекар Тијагарајан, директор во „Комтрендз риск менаџмент сервисис“ (Commtrendz Risk Management Services). „Скапоцениот метал е под притисок пред одлуката на Федералните резерви (ФЕД) в среда“, додаде тој.
Спот-златото поскапе за 0,3 отсто, на 1.637,73 долари за унца, во 12:48 часот во Сингапур, по падот од 0,7 отсто што го забележа во понеделникот. Индексот Bloomberg dollar spot падна за 0,3 отсто. Цените на среброто, паладиумот и платината пораснаа.
Повеќе податоци за третиот квартал во однос на претходната година:
- Вкупната побарувачка за вложување падна за 47 отсто, на 124 тони, предводена од продажбата на ЕТФ.
- Глобалната набавка на накит се зголеми за 10 проценти, на 523 тони, благодарение на Индија.
- Побарувачката од технологијата падна за 8 отсто, на 77 тони.
- Вкупната понуда се зголеми за околу еден процент поради зголеменото производство во рудниците, иако рециклирањето е намалено.
.webp){kind=icon}
