Од декември ќе нема пелети, предупредуваат трговците. Тие тврдат дека во моментов пелетите се увезуваат по најмалку иста или повисока цена од продажната. Владата на 2 ноември донесе одлука да ја ограничи продажната цена на огревното дрво и на пелетите. Според тоа, максималната продажна цена на пелетите е 27 денари за килограм, а трговците со пелети велат дека увозната цена во моментов се движи од 27 до 31 денар.
„Во моментов Турција е единствениот отворен пазар за нас за набавка на пелети, а влезната цена оттаму се движи помеѓу 27 и 31 денар за килограм. Дури веќе имаме увезени количества по тие цени. Ние не можеме да дејствуваме на цените и затоа, во вакви услови, едноставно не е можно да работиме со пелети“, вели Владимир Стојановски, претседател на националното здружение на производители и дистрибутери на продукти од биомаса „Биомак енерџи“.
Владимир Стојановски, претседател на Националното здружение на производители и дистрибутери на продукти од биомаса
За да не се случи пазарот да остане без пелети поради моменталните пазарни услови, трговците бараат Владата да ја врати претходната мерка со која беа ограничени маржите на 10 проценти. На тој начин, како што велат, државата ги штити потрошувачите од евентуално кризно профитерство, но, од друга страна, овозможува фер услови за работа на бизнисите.
Прочитај повеќе
Владата определи максимални цени за огревно дрво и пелети
Кубик огревно дрво даб ќе чини 4.500 денари, кубик бука 6.429 денари кубик, а пелетите 27 ден/кг
02.11.2022
Криза на пазарот: доаѓа време кога „пелети со пари не се купуваат“
Во моментов пелети се увезуваат од Турција, домашното производство покрива само 20 отсто од потребите
11.10.2022
Министерот за економија Крешник Бектеши на денешната прес-конференција во врска со ова прашање кратко образложи дека одлуката пелетите да се продаваат по максимална цена од 27 денари е донесена врз основа на информациите со кои располага Владата, а кои покажуваат дека увозната цена на пелетите изнесува 23 денари за килограм.
МИА / Крешник Бектеши, министер за економија
„Анализите за октомври покажуваат дека увозната цена по тон пелети е 22.940 денари. Во делот на домашното производство на пелети, информации би требало да имаат Македонски шуми и Министерството за земјоделство. Ние постапивме по нивниот предлог“, вели министерот Крешник Бектеши.
На ова реагираат од Здружението на производители и дистрибутери на пелети. Оттаму велат ако Владата располага со такви информации, да се обиде сама да набави пелети по таква цена.
„Тоа е лажна слика. Ја повикувам Владата да изврши набавка на пелети по тие цени, а ние оперативно потоа ќе завршиме сѐ“, вели претседателот на здружението, Стојановски, кој потенцира дека иако барале средба со вицепремиерот за економски прашања Фатмир Битиќи и со министерот за економија Крешник Бектеши, досега не седнале заеднички да ги разгледаат состојбите во оваа индустрија.
Национално здружение на производители и дистрибутери на продукти од биомаса
Трговците велат дека во моментов е можно уште да има внесени пелети со претходно платени пониски цени, а кои само се испорачуваат во октомври, па затоа да дошло до таа средна увозна цена од 23 денари за килограм. Но тие тврдат дека веќе нема од каде да се набават пелети за толку пари.
Во моментов на пелети се греат околу 45.000 домаќинства во Македонија. Од Здружението бараат државата да најде начин да ги субвенционира и овие потрошувачи, како што ги субвенционира тие што се греат на парно. Оттаму сметаат дека на тој начин може да се дојде до некакво компромисно решение на пазарот, во интерес на сите инволвирани страни. На долг рок предлагаат да се изработи и соодветна стратегија за поддршка и стимулирање на домашното производство на пелети, за да се намали увозната зависност, а со тоа барем малку да се контролира цената на пазарот.
Национално здружение на производители и дистрибутери на продукти од биомаса
Македонија е увозно зависна држава кога станува збор за пелети. Годишно во просек се трошат околу 120.000 тони пелети, а дома се произведуваат едвај 20 проценти. Токму од таа причина цената на пазарот е диктирана од надворешни влијание. Проблемот е што пазарите од каде што Македонија најчесто се снабдуваше со пелети сега не извезуваат. На пример, Србија и Босна и Херцеговина го забранија извозот, а Бугарија и Црна Гора имаат ограничени квоти за извоз, за да го заштитат домашниот пазар. Од таа причина, Турција останува единствена алтернатива за снабдување со пелети во моментов, но нивната цена постојано расте, особено со навлегувањето во зимата и грејната сезона.
Инаку, денеска и босанската влада донесе одлука со која ги ограничи максималните продажни цени на пелетите, на 244 евра за тон. Со таквата одлука сметаат дека ќе ги заштитат граѓаните од неоправдано високи цени во трговијата, бидејќи се соочуваат со ситуација кога трговците кријат количества со намера да ги продаваат подоцна, во услови кога ќе се покачи цената. Сепак, Босна и Херцеговина има доволно количества пелети за домашниот пазар и е една од поголемите држави извозници на оваа суровина во регионот.
Трговците од земјава се надеваат дека власта ќе ги чуе и ќе најдат решение за проблемот, но доколку не се случи тоа, останува неизвесно дали во декември ќе има пелети во продажба и дали овие компании ќе ги задржат сите вработени или ќе го намалат нивниот број и ќе се преориентираат на своите секундарни и терцијални дејности.
.webp){kind=icon}