Конфликтот меѓу Русија и Германија претставува ризик следната зима да остане празен еден од најголемите магацини за складирање на природен гас во централна Европа, во услови кога континентот итно треба да обезбеди снабдување поради војната во Украина.
Подземниот магацин Хајдах, лоциран во Австрија, но поврзан само со германската мрежа, веројатно нема да се пополни откако Москва го прекина снабдувањето на единицата на „Гаспром“ запленета од владата во Берлин, тврдат функционери од енергетските кругови во Виена, кои побарале да останат анонимни.
Депото е еквивалентно на околу една четвртина од австрискиот капацитет за складирање.
Европа треба да направи залихи на гориво за населението да се грее во претстојната зима, а индустриите тековно да работат. Но, руските санкции кон „Gazprom Germania“ (Гаспром Германија), како одмазда за тоа што Берлин ја заплени таа единица претходно годинава, го лишуваат Хајдах од клучните резерви потребни за енергетската безбедност доколку војната во Украина го наруши транзитот на гас до континентот.
Работите да бидат уште полоши, австриските напори да се скрши германското „тесно грло“ и да се складира гас на локацијата се погодени од ограничувањата на гасоводот. Алпската земја ќе треба да најде начин да го поврзе Хајдах со австриската мрежа, а националниот мрежен оператор сè уште анализира како може да ги исполни барањата на владата.
„Од техничка перспектива, ќе треба да се изгради врска помеѓу складиштето и гасоводот Penta West (Пента Вест)“, информираат преку електронска пошта од операторот „Gas Connect“ (Гас Конект) за „Блумберг“.
Австрискиот Пента Вест е најблискиот гасовод што би можел да се прошири за да го поврзе Хајдах со остатокот од австриската мрежа долга 900 километри. Добивањето на потребните регулаторни и еколошки дозволи за тоа може да трае со години, вели еден функционер. Дури и да се доделат сите одобренија, капацитетот на гасоводот Пента Вест е веќе целосно резервиран од трговците кои ги поттикнуваат европските пазари.
Bloomberg
Вториот тендер за гас што се подготвува во Виена, кој би можел да се додели за да помогне во полнењето на Хајдах со други залихи освен руски, исто така се соочува со предизвици бидејќи не постои начин да се потврди од каде доаѓа горивото откако ќе се вбризга во цевководите, објаснува втор официјален претставник.
Хајдах беше изграден од „Гаспром“ и германската „Wingas“ (Вингас) и беше отворен во 2007 година. Со него управува австриската РАГ АГ. Објектот има капацитет да складира околу 33 терават часови гас, доволно за покривање на речиси четири месеци од австриската потрошувачка.
Австрија добива околу 80 отсто од својот гас од Русија и предупреди дека отсекувањето од нејзиниот најголем снабдувач ќе ја втурне земјата во рецесија. Леонор Гевеслер, висока австриска енергетска функционерка, претходно овој месец изјави дека земјата е подготвена да потроши дури 5 милијарди евра за полнење на складиштата, преку тендери кои може да вклучуваат руски добавувачи.
Во вторникот, земјата плати премија 45 отсто над референтните европски цени во својот прв тендер за создавање стратешка резерва за гас пред почетокот на грејната сезона.
.webp){kind=icon}
