Цената на природниот гас во Европа порасна бидејќи времето е поладно од просекот и температурите почнаа да паѓаат во целиот регион, додека производството од ветер се соочува со проблеми во последната недела. Пониските температури се погодија во исто време со можна поголема конкуренција во побарувачката за енергија од страна на Кина. Таа азиска земја се оддалечи од својот долгогодишен пристап на политиката на нулта ковид, а трговците се обложуваат дека тамошното економско заздравување може да ја зголеми побарувачката за течен природен гас.
Терминските договори пораснаа дури за 8,6 проценти пред да се спуштат на зголемување од 7,8 отсто. Европејците почнуваат да ги греат своите домови и деловни простории додека северниот дел од регионот се соочува со ниски температури, кои ќе останат такви и во следните две недели, според временската прогноза.
Испораките од Норвешка, клучниот испорачател во услови на намалени испораки на гас од руските гасоводи, паднаа на најниско ниво од петокот поради дополнителни работи во производствените погони.
Движење на цената на гасот во Европа / Bloomberg Mercury
Трговците следат колку ќе трае ладното време во Европа и колку ќе се прошири во Азија. Со помал проток низ гасоводите што доаѓаат од Русија, Европа во голема мера зависи од испораките на течен природен гас, кои регионот успешно ги привлекува во услови на слаба побарувачка од страна на големите азиски купувачи.
Европа во ноември увезе повеќе од 11,4 милиони тони течен природен гас, што претставува рекорд на сите времиња, според „Ристад енерџи“ (Rystad Energy). Но таквата достапност наскоро може да се промени. Кина ги зголеми нарачките минатиот месец, откако и таму паднаа температурите, а побарувачката за греење на јаглен и гас исто така порасна. Сега владата на земјата ги отфрли клучните начела на својата стратегија за елиминација на вирусот, што би можело да овозможи брзо економско заздравување и дополнително да ги зголеми потребите за енергија.
„Помалата побарувачка во Кина ѝ помогна на Европа. Но ако повторно видиме отворање на кинеската економија, може да се соочиме со пренасочување на течниот природен гас натаму. Способноста на Кина да го обнови растот сега е важен знак на прашање“, рече Франк ван Доорн, раководител за тргување во „Вотенфол“ (Vattenfall).
Холандските термински договори, кои се европско мерило, денеска изнесуваа 149,25 евра за мегават-час. Германската и француската енергија за месец однапред исто така добија на вредност, бидејќи ладното време и растечките цени на гасот го поскапеа горивото за електроцентралите на континентот. „Цените на гасот за ден однапред во Обединетото Кралство пораснаа дури за 12 проценти, поттикнати од ниските температури и слабото производство на енергија од ветер во последната недела“, соопшти „Ристад енерџи“.
.webp){kind=icon}
