Цените на природниот гас во Европа се движат кон четврта неделна загуба со ублажување на енергетската криза во услови на несоодветно топлото време што ја намали побарувачката за греење.
Референтните фјучерси го продолжија својот пад, кој неделава достигнува девет отсто. Топлите температури најверојатно ќе продолжат и следната недела, со многу потопло од просечното време за Франција и за Германија, предвидува „Максар“ (Maxar Technologies Inc).
Цените на енергијата беа клучен двигател на инфлацијата, а неочекувано ниската побарувачка го олеснува товарот на потрошувачите и го поттикнува оптимизмот кај европските власти. По рекордните цени минатата година и стравувањата дека владите ќе мора да прибегнат кон рационализирање, благата зима е подарок што му помага на регионот да ги задржи резервите на здрави нивоа.
„Ние сме многу оптимисти, а не бевме такви во текот на есента“, рече Клаус Милер, претседател на германскиот мрежен регулатор, во интервју за јавниот радиодифузен сервис АРД, додавајќи дека недостигот од гас оваа зима е малку веројатен. „Колку повеќе гас имаме во складиштата во почетокот на годината, со толку помалку стрес и трошоци ќе се соочиме при нивното повторно полнење за следната зима“, рече Милер.
Европските резерви во моментов се со 83 проценти исполнетост, што е над петгодишната сезонска норма за овој период од годината, при што некои земји дури испратија гас во складиштата во последните денови. Во Германија, најголемата економија во регионот, тоа ниво е речиси 91 отсто.
Холандските фјучерси се тргуваа за 4 отсто пониско и утрово чинат 69,50 евра за мегават-час, откако вчера скокнаа дури за 11 проценти.
.webp){kind=icon}
